سوێد چۆن‌ بارودۆخه‌که‌ی ئێڕان تێده‌بینێت.

سوێد ڕه‌خنه‌ی ده‌ره‌وه‌ و ناوه‌وه‌ی وڵاتی به‌و هۆیه‌وه‌ تێگیراوه‌، باڵیۆزی سوێد له‌  ئێران به‌شداری ڕێوڕه‌سمی سوێندخواردنی ئه‌حمه‌دی نه‌جات بووه‌ که‌ سه‌رله‌نوێ ‌به‌ سه‌رۆکی ئێران هه‌ڵبژێردرا. به‌ڵام وه‌زیری ده‌ره‌وه‌ی سوێد ڕه‌خنه‌کان له‌ خۆی دوور ده‌خاته‌وه‌.

مه‌حموود ئه‌حمه‌دی نه‌جات که‌ دوو ڕۆژی له‌مه‌وبه‌ر، له‌ په‌رله‌مانی ئێران، سوێدنی سه‌رۆکایه‌تیکردنی وڵاته‌که‌ی خوارد، چوار ساڵی تر ئه‌و وڵاته‌ به‌ ڕێوه‌ ده‌بات. گه‌لێکی ئه‌وانی که‌ چاوه‌ڕێ ده‌کرا له‌و ڕێوڕه‌سمه‌دا به‌شدار ببن، جێیان دیار بوو، بۆ نموونه‌ سه‌رۆکی به‌رهه‌ڵستکاران میر حوسێن موسه‌وی و سه‌رۆکی پێشووتری ئێران موللا ئه‌کبێر هاشمی ڕه‌فسه‌نجانی. له‌ هه‌مان کاتدا پۆلیس ئاڵه‌ته‌گازی به‌ گژ ئه‌و خۆپێشانده‌رانه‌ کرد که‌ به‌رده‌رگه‌ی باڵاخانه‌که‌ی په‌رله‌مانیان گرت. هه‌واڵ وایه‌ که‌ زۆری خۆپێشانده‌ره‌کان گیراون و له‌ گرتووخانه‌ نراون.  

ڕابه‌رانی ڕیزێک وڵاتی یه‌کیه‌تیی ئه‌ورووپا، که‌ نموونه‌یان‌ ئه‌ڵمانیا و فه‌رانسه‌ و به‌رتانیایه‌، وه‌کوو وڵاته‌ یه‌کگرتووه‌کانی ئه‌مه‌ریکا، خۆیان دووره‌په‌رێز گرت و به‌ باشیان گرت پیرۆزبایی له‌ ئه‌حمه‌دی نه‌جات نه‌که‌ن، که‌ به‌ سه‌رۆکی ئێران هه‌ڵبژێردرایه‌وه‌. سوێدیش پێرۆزبایی نه‌ناردووه‌ ـ سوێد به‌ نه‌ریتی گرتووه‌ پیرۆزبایی له‌ سه‌رۆکی حوکوومه‌تێک نه‌کات که‌ له‌ ده‌سته‌ڵاته‌ و هه‌ڵده‌بژێردرێته‌وه‌. به‌ڵام باڵیۆزی سوێد له‌ ئێران ماگنۆس ڤێرنشتێد Magnus Wernstedt یه‌کێکی ئه‌و مێوانه‌‌ ده‌ره‌کییانه‌ بوو که‌ له‌و ڕێوڕه‌سمه‌ نێوده‌وڵه‌تییه‌دا به‌شدار بووه‌ و ، که‌ به‌ لای ئاندێرش یۆرلێی ڕاوێژکاری ڕۆژنامه‌گه‌ریی وه‌زاره‌تی ده‌ره‌وه‌ی سوێده‌وه‌ کارێکه‌ دیتی سوێد ئاشکرا ده‌کات. یۆرلی ده‌ڵێت سوێد له‌و باوه‌ڕه‌دایه‌ که‌ له‌ ڕێ پێوه‌ندیی دێپلۆماسییه‌وه‌ ده‌توانێت ڕاوبۆچوونی خۆی له‌مه‌ڕ بارودۆخی وڵاتانی تر بخاته‌ ڕوو، بۆیه‌یشه‌ باڵیۆزی سوێد له‌و ڕێوڕه‌سمه‌دا به‌شدار بووه‌.

لێره‌ له‌ سوێد دوو نوێنه‌ری بزووتنه‌وه‌ی هاوگه‌ریی له‌گه‌ڵ خه‌ڵکانی ئێران چاویان به‌ داگ یولین دانفێلتی سه‌ر به‌ به‌شی خاوه‌رمیانی وه‌زاره‌تی ده‌ره‌وه‌ی سوێد که‌وت و ناڕه‌زایی خۆیان دژ به‌ به‌شداریکردنه‌ سوێدییه‌که‌ ده‌ربڕێ. میهرداد ده‌رڤیشپوور که‌ کارسازی بزووتنه‌وه‌ی هاوگه‌ریکردنی خه‌ڵکانی ئێرانه‌ ئه‌م به‌شدارییه‌ سوێدییه‌ دڵی ڕه‌نجاندووه‌.

میهرداد ده‌رڤیشپوور ده‌ڵێت به‌شداربوونی باڵیۆزی سوێدێک که‌ سه‌رکرده‌ی ئێستای یه‌کیه‌تیی ئه‌ورووپایه‌ له‌ ڕێوڕه‌سمێکی وا ئومێدی ئێمه‌، ئێمه‌ی سوێدی ـ ئێرانی بڕیوه‌، ئه‌م کاره‌ی له‌ ئێرانییه‌ نیشته‌نییه‌کانی هه‌موو ئه‌ورووپایش کردووه‌. ئێمه‌ لامان وایه‌ ـ ده‌رڤیشپوور ده‌ڵێت  ـ که‌ هیچ نه‌بووایه‌ سوێد وه‌ک هوڵه‌ندای بکردایه‌ که‌ له‌و به‌زمه‌دا به‌شدار نه‌بوو، یان وه‌ک ئه‌ڵمانیا بڕه‌وتایه‌ که‌ باڵیۆزی خۆی ڕه‌وانه‌ی ئه‌و ڕه‌سمه‌ نه‌کرد، به‌ڵکه‌ به‌رده‌ستێکی. ئێمه‌ چاومان له‌وه‌یه‌ که‌ سوێد و یه‌کیه‌تیی ئه‌ورووپا وه‌ک ئه‌ڵمانی و فه‌رانسه‌ و به‌ریتانیایان بکردایه‌ که‌ به‌ ڕاشکاوی ڕایانگه‌یاند که‌ ئه‌م کاره‌ له‌ ئه‌حمه‌دی نه‌جات پیرۆز ناکه‌ن.

میهرداد ده‌رڤیشپووری بزووتنه‌وه‌ی هاوگه‌ری له‌گه‌ڵ خه‌ڵکانی ئێران ده‌ڵێت ئێمه‌ داوامان وایه‌ که‌ سوێد و یه‌کیه‌تیی ئه‌ورووپا ئه‌حمه‌دی نه‌جات به‌ سه‌رۆکی ئێران نه‌زانن. دووریش نییه‌ به‌شداربوونه‌که‌ی سوێد له‌و ڕێوڕه‌سمه‌‌ ڕه‌نگه‌ به‌ هه‌ڵه‌ لێک بدرێته‌وه‌.  ئێمه‌ ڕه‌خنه‌ی تونمان له‌و ڕه‌وتاره‌یه و ده‌مانه‌وێت ـ ده‌رڤیشپوور ده‌ڵێت، سڵ له‌ به‌کارهێنانی هیچ ئامرازێک نه‌که‌نه‌وه‌ و فشار بۆ حوکوومه‌تی ئێرانن به‌رن، که‌ پاشه‌کشه‌ بکات، که‌ گشت زیندانییه‌ سیاسییه‌کان و هه‌موو گیراوێکی ئه‌م دواییه‌ ئازاد بکات و شاندێکی نێوده‌وڵه‌تی ڕه‌وانه‌ی ئێران بکرێت بۆ ئه‌وه‌ی له‌ پرسه‌که‌ بکۆڵێته‌وه‌.

بزووتنه‌وه‌ی هاوگه‌ریی خه‌ڵکانی ئێران ئه‌و کۆتیربارانکردنه‌ مه‌حکووم ده‌کات که‌ له‌ ئێران درێژه‌ی هه‌یه‌ و ده‌یه‌وێت یه‌کیه‌تیی ئه‌ورووپا و سوێد کار له‌م پێناوه‌دا بکه‌ن. میهرداد ده‌رڤیشپوور ده‌ڵێت ئه‌وان وه‌ڵامیان داوه‌ته‌وه‌ و ئێمه‌ لێمان پرسیون بۆ ئاشکرای ناکه‌ن؟ که‌ به‌ ئاشکرا ڕه‌خنه‌ له‌ حوکوومه‌تی ئێران بگرن وه‌ک پشتگیریکردنی خه‌ڵکانی ئێران ده‌که‌وێته‌وه‌.

ڕه‌خنه‌ی له‌م جۆره‌ له‌ هه‌موو لایه‌که‌وه‌ ئاڕاسته‌ی سوێد کراوه‌، به‌ڵام وه‌زیری ده‌ره‌وه‌ کارل بیلد ڕه‌تیان ده‌کاته‌وه‌.

کارل بیلد ده‌ڵێت سیاسه‌تی ده‌ره‌وه‌ی ئێمه‌ به‌ گوزاره‌ خۆمان  و ده‌ریده‌بڕێن و له‌و هه‌ڵوێستانه‌وی سه‌رچاوه‌ ده‌گرێت که‌ گرتوومانن. له‌ لایه‌کی تره‌وه‌ ئێمه‌ باڵیۆزی خۆمان له‌ هه‌موو وڵاتێکی هه‌موار و ناهه‌مواردا هه‌ن، بێ ئه‌وه‌ی ڕێژیمی ئه‌و وڵاتانه‌ له‌ به‌رچاو بگرین. به‌ لای وه‌زیری ده‌ره‌وه‌ی سوێد کارل بیلده‌وه‌ باشتر وایه‌ چاودێری سوێد له‌ وڵاتی وادا هه‌بن.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade ljud i menyn under Min lista