ژماره‌ی کارده‌ستی بیانی له‌ سوید زیادی کردووه‌

ئه‌مڕۆ ساڵێک به‌سه‌ر خستنه‌ کاری ئه‌و رێسایانه‌دا تێپه‌ڕیوه‌ که‌ ڕێی بۆ ده‌ستیکاری بیانی له‌ که‌سانی ده‌ره‌وه‌ی وڵاتانی ئه‌ورووپا ‌بۆ کارکردن له‌ سوید خۆش ده‌کات، نزیکه‌ی چوارده‌هه‌زار که‌س له‌و کاته‌وه‌ی ئه‌و ڕیسا نوێیانه‌ له‌لایه‌ن حوکوومه‌تی سویدییه‌وه‌ خراونه‌ته‌ کار ،هاتوونه‌ته‌ سوید. وه‌زیری کۆچ توبییاس بیلستریۆم ئه‌م گۆڕانکارییه‌ به‌ باش ده‌زانێت.

 - به‌ڕای من ئه‌مه‌ جێی شادومانییه‌ که‌ دوای ساڵێک له‌و ڕیفۆرمانه‌ی بۆ پڕکردنه‌وه‌ی پێویستییه‌کان له‌ سیستێمی کۆچهێنیی ده‌ستی کاردا کراوه‌، ده‌رئه‌نجامێکی وا باشی داوه‌ته‌وه‌. ژماره‌یه‌کی زۆر ڕێگه‌یان بۆ کرایه‌وه‌ تا بۆشاییه‌کان له‌ بازاڕی کاری سویددا پڕبکه‌نه‌وه‌ و توانیویانه‌ فرسه‌تی کاری نوێش دابهێنن. 

یه‌کێک له‌و که‌سانه‌ی که‌ وه‌ک ده‌ستیکار بیانی هاتۆته‌ سوید و خۆیی و هاوسه‌ر و منداڵه‌کانی مۆڵه‌تی کاتتیان هه‌یه‌، ماهر مانکارژوس،ه‌ که‌ له‌ میسره‌وه‌ بۆ کار له‌بواری چێشتخانه‌دا هاتۆته‌ سوید، ئه‌و باس له‌ هه‌نگاوه‌کانی هاتنی ده‌کات. 

- په‌یوه‌ندیم به‌ خاوه‌نی ئیشکه‌وه‌ کرد که‌ له‌ ڕێی ئینته‌رنیته‌وه‌ ئاگاداری کاری بڵاوکردبۆوه‌، و ئه‌ویش داوای دامه‌زراندنی بۆ ناردم ئینجا له‌ ڕێیی باڵیۆزخانه‌وه‌ داوای مۆڵه‌تی کارم پێشکه‌ش کرد. پاشان شه‌ش هه‌فته‌ی پێ چوو تا داوه‌تی کارکرنم له‌ سوید په‌سه‌ند کرا، و پاش هاتنم به‌ چه‌ند مانگێک هاوسه‌ر و منداڵه‌کانیشم هاتن. 

له‌گه‌ڵ خستنه‌ کاری ڕیسای نوێی کۆچ تایبه‌ت به‌ ده‌ستی کاری بیانی ده‌ستگه‌ی کۆچ چاوه‌ڕیی شه‌پۆلێک له ‌داوای مۆڵه‌تی کاریان ده‌کرد به‌ڵام ئه‌و ڕێسایانه‌ هاوکات بوو له‌ گه‌ڵ هاتنی قه‌یرانه‌ ئابورییه‌که که‌ وای کرد فرسه‌تی کاری له‌ سویدا که‌م بۆوه‌. به‌ڵام له‌گه‌ڵ ئه‌وه‌شدا ژماره‌ی ده‌ستیکاری بیانی به‌راورد به‌ ساڵانی ڕابوردوو له‌ سه‌دا 30 زیادی کردوه‌.

 شاره‌زایانی بواری کۆمپیوته‌ر و ئه‌ندازیاری مه‌ده‌نی هه‌روه‌ها ته‌کنیککاران له‌‌و گروپ و پسپۆڕیانه‌ن که بۆ کار هاتونه‌ته‌ سوید.  کرستینا ڤارنه‌ر به‌رپرسی به‌شی چالاکیه‌کانه‌ له‌ ده‌ستگه‌ی کۆچ ده‌ڵیت ئه‌م کارانه‌ به‌پێی یاسا و ڕێسا کۆنه‌کانی کۆچ هه‌ر ڕێپیدراو بووه‌  به‌ڵام ئه‌وه‌ی که‌ ڕێسا نوێکانی کۆچ بۆ هاتنی ده‌ستیکاری بیانی ‌ خۆش کردووه‌ پسپۆری بواره‌کانی چێشتخانه‌، پاکژکاری و کاروباری ناوماڵه‌.

جێی باسه‌ به‌ پێی ئه‌م ڕیسا نوێیانه‌ی کۆچ ، ئه‌و که‌سه‌ی بۆ کار دێته‌ سوید مۆڵه‌تی بۆ ماوه‌یه‌کی که‌م ده‌دریتێ بۆ نموونه‌ ئه‌و که‌سانه‌ی که‌ بۆ کۆکردنه‌وه‌ تووی هاوینه‌ دێنه‌ سوید، به‌ڵام هه‌ندێک بۆ ماوه‌ی دووساڵ مۆڵه‌تی کاریان پێ ده‌درێت و ده‌کرێت ئه‌و ماوه‌یه‌ جارێکی تر نوێ بکرێته‌وه‌، که‌سێکێش که‌ بۆ ماوه‌ی چوارساڵ مۆڵه‌تی کارکردنی هه‌بووبێت بواری وه‌رگرتنی مۆڵه‌تی هه‌میشه‌یی بۆ ده‌کرێته‌وه‌.     

 وه‌یزی کۆچ توبیاس بیلستریۆم  باس له‌‌ داهاتووی ئه‌م ڕێسایانه‌ و گرنگی هاندانی کۆچهێن له‌ده‌ره‌وه‌ی وڵاتانی یه‌کیه‌تیی ئه‌ورووپا بۆ کارکردن له‌ سوید ده‌کات.

- پێویستیی به‌ ده‌ستیکاری بیانیانی له‌ که‌سانی ده‌ره‌وه‌ی وڵاتانی یه‌کیه‌تیی ئه‌ورووپا ده‌بێت به‌هه‌ند بگیرێت، له‌لایه‌که‌وه‌ به‌ هۆی ئه‌و گۆرانکارییه‌ دیموگرافیانه‌ی چاوه‌ڕێی ئه‌ورووپا ده‌که‌ن به‌تایبه‌ت که‌ ژماره‌یه‌کی زۆر خانه‌نشین ده‌بن، له‌لایه‌کی تریشه‌وه‌ ئێمه‌ ئیستا به‌شێکین له‌ بازاڕی کاری جیهانی. ئێمه‌ وڵاتێکی بچوکین که‌ پشتمان به‌ نارده‌ به‌ستووه‌، ئێمه‌ ئه‌بێت ڕێگا بۆ نارده‌ بۆ وڵاتان و کلتوری تری دونیا خۆش بکه‌ین.  بیلستریۆم هه‌روه‌ها جه‌خت له‌وه‌ ده‌کاته‌وه‌ که‌ ده‌بێت ڕه‌هه‌نده‌ جیاوازه‌کانی ئه‌م پرسه‌ له‌به‌رچاو بگیرێت به‌شێوه‌یه‌ک کاتیک ڕیساکان له‌گه‌ڵ بازاڕی کاری جیهانیدا ده‌گونجێنرێت له‌هه‌مانکاتدا ده‌بێت مۆدێلی بازاڕی کاری سویدی و تایبه‌تمه‌ندییه‌کانیشی بپارێزین.

ئه‌م قسانه‌ی وه‌یزی کۆچ له‌ کاتێکدایه‌ که‌ ڕێسای کۆچی سوید به‌ جۆرێک له‌  دڵفراوانیی چاو لێ ده‌کرێت، ئه‌مه‌ به‌راورد به‌ وڵاتانی تری یه‌کییه‌تی ئه‌ورووپا.

- به‌ڵی، تا ڕاده‌یه‌ک ڕێساکانی سوید جیاوازییان هه‌یه‌ و ئه‌مه‌ش یه‌کێکه‌ له‌ ئامانجه‌کانی حوکوومه‌ت که‌ وه‌ک هانده‌ری کیبه‌ڕکێ له‌گه‌ڵ وڵاتانی تردا، بۆ هاتنی ژماره‌یه‌کی زۆرتری ده‌ستی کار بۆ سوید دای هێناون، بۆ نموونه‌ توبییاس بیلستریۆم ده‌ڵێت ئه‌و که‌سه‌ی بۆ کار دێته‌ سوید مافی هێنانی هاوسه‌ره‌که‌شی به‌هه‌مان مه‌رج و ڕێسای بازاڕی کاری سوید هه‌یه‌، ئه‌مه‌ یه‌کێکه‌ له‌و جیاوازیانه‌ی ڕێساکانی سویدا به‌راورد به‌ وڵاتانی تری یه‌کیه‌تی ئه‌و‌رووپا که‌ ڕێ ناده‌ن هاوسه‌ری ئه‌و که‌سه‌ی بۆ کار دێته‌ وڵاته‌که‌یان  کار بکات.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade ljud i menyn under Min lista