که‌شتیی کۆمه‌کی ئاشتیپارێزان بۆ غه‌ززه‌ به‌ڕێوه‌یه‌

ده‌ که‌شتیی بارهه‌ڵگری پڕ له‌ ده‌واوده‌رما نو کره‌سته‌ی بیناسازی و کتێبی په‌رورده‌ به‌ده‌م ڕێی ڕوو له‌ غه‌ززه‌وه‌ن، که‌ دانیشتوانه‌که‌ی گه‌مارۆی ئابووری دراون. ئه‌م هه‌وڵه‌ ڕێکخراوێکی کۆمه‌کردنی تورکی سه‌رپه‌ڕشتیی ده‌کات که‌ ده‌سته‌ و گرۆی لاگری مافه‌کانی مرۆڤ له‌ گه‌لێ وڵات ـ سوید به‌ نموونه‌ ـ پشتگیریی ده‌کات و، گه‌لێک سوێدییش له‌و سه‌فه‌ره‌ به‌شدارن، هێنینگ مانکێلی نووسه‌ر و ماتییاس گاردێلی مێژووناسی ئایین و مێهمێت کاپلانی ئه‌ندامی په‌رله‌مان و درور فێیله‌ری هونه‌رمه‌ندی هه‌م سوێدی  و هه‌م ئیسرائیلی. ئیسرائیل ڕه‌خنه‌ی توندی له‌م کاره‌یه‌ و بڕیاری بڕنده‌ی داوه‌ که‌ ڕێی که‌شتییه‌کان ببڕێت و گوته‌بێژی وه‌زاره‌تی ده‌ره‌وه‌ی ئیسرائیل ـ ییگال پالمور ـ باس له‌وه‌ ناکات که‌ ئیسرائیل چؤن ڕێی که‌شتییه‌کان ده‌گرێت به‌ڵام به‌ دووری ناگرێت هێزی لێ به‌ کار بێنێت.

ئیسرائیل ئه‌م هه‌وڵه‌ی ڕێکخراوه‌ خێرخوازه‌کان به‌ کرده‌وه‌یه‌کی ورووژێنی چالاکوانی وا ده‌زانیت که‌ فرمانی بزووتنه‌وه‌ی حه‌ماس جێبه‌جێ ده‌که‌ن و هیچیان به‌سه‌ر کۆمه‌کی مرۆڤانه‌وه‌ نییه‌. ییگال پالمور ده‌زانێت که‌ ڕووبه‌ڕووبوونه‌وه‌یه‌کی ده‌ریایی له‌نێوان که‌شتییه‌ جه‌نگییه‌کانی ئیسرائیل و که‌شتییه‌ بارهه‌ڵگره‌کان و ئاشتیخوازان که‌ ده‌یانوێت کۆمه‌کی دانیشتوانی غه‌ززه‌ بکه‌ن، ئاوڕووی ئیسرائیل له‌که‌دار ده‌کات، به‌ڵام ده‌ڵێت ئێمه‌ ناتوانین ڕێی حه‌ماس خۆش بکه‌ین که‌ ئه‌م کاره‌ وه‌ک پڕوپاڵاوته‌ی سه‌رکه‌وتن به‌ کار ببات.