ئاسانکاری بۆ ئه‌وانه‌ی ده‌یانه‌وێ له‌ یه‌کێتیی ئه‌ورووپادا کار بکه‌ن

سه‌رۆکی ده‌سته‌ی به‌ڕێوه‌به‌ریی یه‌کێتیی ئه‌ورووپا ـ سێسیلیا مالمستروێم ـ ده‌یه‌وێ بوار بۆ ئه‌وانه‌ی ده‌یانه‌وێ له‌ ناو یه‌کێتیی ئه‌ورووپادا کار بکه‌ن، هه‌موار بکات‌. بۆ ئه‌وه‌ش دوو پێشنیاری هه‌یه‌ که‌ ده‌یه‌وێ له ‌لایه‌که‌وه‌ پسپۆڕان به‌ پله‌ی به‌رزی خوێندن، به‌ره‌و یه‌کێتییه‌که‌ راکێشێ و له‌ لایه‌کی تره‌وه‌ ڕێسا و یاساکانی هاتنی کرێکارانی که‌مخوێندوو ئاشکراتر بکات تا پێشی‌ چه‌وساندنه‌وه‌یان بگیرێ. بۆ نموونه‌ لانی که‌می مووچه‌ و بیمه‌ی خانووبه‌ره‌یان دیار کرابێ.

سێسیلیا مالمستروێم ده‌ڵێ ئه‌مڕۆ ڕێسا و یاساکانی کاری که‌مخوێندووان به‌ڕاستی ناڕوونه‌. گه‌لێ که‌س ده‌چه‌وسێنرێنه‌وه‌ و به‌ هه‌قده‌ستێکی زۆر که‌م کار ده‌که‌ن. له‌ پله‌ی یه‌که‌میشدا که‌مخوێندووانی کرێکاری‌ بواری میوه‌ و سه‌وزه‌ن‌ که‌ ساڵانه‌ ده‌گه‌نه‌ سه‌دهه‌زار که‌س. ئه‌وه‌ی تریشیان شیرکه‌ته‌ گه‌وره‌کان ده‌گرێته‌وه‌ که‌ ده‌یانه‌وێ کارمه‌ندانیان بگوازنه‌وه‌ بۆ یه‌کێتیی ئه‌ورووپا و به‌ هۆی کاغه‌زبازیی و بۆرۆکراتیی یه‌کجار زۆر، پێشیان پێ گیراوه‌.