وه‌زیری هاوگونجی: با نیقاب له‌ خوێندنگاکاندا قه‌ده‌غه ‌بکرێت

وه‌زیری هاوگونجی له‌سه‌ر لیستی پارتی گه‌لی لیبرال ئێریک ئوله‌نهاگ ده‌یه‌وێت یاساکان وا بگۆڕێت که‌ فێرگاکان مافی ئه‌وه‌یان هه‌بێت فێرخواز له‌ خوێندن ده‌ربکه‌ن گه‌ربێت و ده‌موچاویان داپۆشراو بێت.

- به‌ڵێ ڕێسایه‌کی وا دێیته‌ کایه‌وه‌ که‌ به‌ڕێوه‌به‌ر یاخود مامۆستا به‌ پێێ یاسا بۆیان ده‌بێت به‌ر له‌و فێرخوازانه‌ بگرن بێنه‌ پۆلی وانه‌ خوێندنه‌وه‌ که‌ ده‌موچاویان داپۆشراوه‌. ئه‌وه‌یش له‌به‌ر ئه‌وه‌ی ئولێنهاگ ده‌ڵێت که‌ به‌شێکی گرنگی وانه‌ وتنه‌وه‌ بریتییه‌ له‌ په‌یوه‌ندی ڕاسته‌وخۆو بینینی جوڵه‌ و ده‌ربڕینه‌کانی ده‌موچاوی یه‌کتر. 

به‌ڵام کارکردن بۆ هێنانه‌ کایه‌ی یاسایه‌کی له‌و جۆره‌ ته‌نها له‌ ئه‌جێندای پارتی گه‌لی لیبرالدایه‌ واتا تا ئێستا له‌ ڕه‌وتی کاری حکوومه‌تدا نییه‌، ئوله‌نهاگ جه‌خت له‌م خاله‌ ده‌کاته‌وه‌ و به‌هیوایه‌ له‌گه‌ڵ حوکوومه‌تدا له‌سه‌ر ئه‌م خاڵه‌ ڕێک بکه‌ون.

-  یاساکان له‌م بواره‌دا گه‌لێک ڕوونن و نیقاب پۆشی قه‌ده‌غه‌ نییه‌،  کاتری لینا له‌ نوێنه‌رایه‌تی دژ به‌ هه‌ڵاواردنه‌وه‌ ده‌ڵێت  ده‌بێت بۆ هه‌ر حاڵه‌ت و که‌سێک که‌ نیقاب ده‌پۆشێت هه‌ڵسه‌نگاندنێکی تایبه‌ت بکرێت که‌ ئاخۆ ڕووپۆشه‌که‌ی کاریگه‌ری له‌سه‌ر کاره‌که‌ی و ئه‌وانه‌ی کاریان له‌گه‌ڵ ده‌کات ده‌بێت یان نا.

نوێنه‌رایه‌تی دژ به‌ هه‌ڵاواردن (diskrimineringsombudsmannen) له‌ بڕیارێکیاندا ده‌ڵێن که‌ بێ به‌شکردنی فێرخوازان له‌ خوێندن به‌هۆی سه‌رپۆش و نیقابه‌وه‌ هه‌ڵاواردنه‌. ئه‌م بڕیاره‌ له‌به‌ر ڕۆشنایی ئه‌و سکاڵایه‌وه‌ دێت که ساڵی پار‌ ژنێکی نیقاب پۆش له‌ ستۆکهۆلم بۆ ئه‌م نوینه‌رایه‌تییه‌ی ناردبوو. ئه‌و ژنه‌ که‌ خوێندنی تایبه‌ت به‌ چاوه‌دێری مناڵانی ده‌خوێندن پێی ڕاگه‌یه‌نرابوو گه‌ر بیه‌وێت له‌ خوێندن به‌رده‌وام بێت و له‌ داهاتوودا کار له‌و بواره‌دا وه‌ربگرێت نابێت نیقاب بپۆشێت ئاخر ناکرێت کار له‌ گه‌ڵ مناڵاندا بکات بێ ئه‌وه‌ی بتوانن ده‌موچاوی ببینن که‌ به‌ نیقاب دای پۆشیووه‌. به‌ڵام له‌ به‌دواداچونه‌که‌ی نوێنه‌رایه‌تی دژ به‌ هه‌ڵاواردنا هاتووه‌، که‌ له‌ حاڵه‌تی ئه‌م ژنه‌دا نیقابه‌که‌ی کاریگه‌ری له‌سه‌ر فێرخواز و کاره‌که‌ی نابێت.

ساڵی 2003 ده‌ستگه‌ی کاروباری خوێندنگاکان له‌سه‌ر پرسی ڕوپۆش یان نیقاب و سه‌رپۆش گه‌شتنه‌ ڕێککه‌وتنێک که‌ به‌و پێیه‌ به‌ڕێوه‌به‌ری فێرگاکان مافی ئه‌وه‌یان هه‌یه‌ که‌ سه‌رپۆش و نیقاب قه‌ده‌غه‌ بکه‌ن. ئه‌مه‌ له‌ کاتێکدایه‌ که‌ به‌پی یاسا ده‌بێت فێرگاکان بواری خوێندن بۆ هه‌موو که‌سێک به‌ بێ جیاوازی بۆ نموونه‌ جیاوازی ئایین‌ بڕه‌خسێنن. به‌ڕای نوێنه‌رایه‌تی هه‌ڵاواردن ئه‌م به‌شه‌ی یاسا له‌ حاڵه‌تی ئه‌و ژنه‌ نیقاب پۆشه‌دا له‌به‌رچاو نه‌گیراوه‌. به‌ڵام سکاڵای ژنه‌که‌ له‌لایه‌ن نوێنه‌رایه‌تی هه‌ڵاواردنه‌وه‌ نه‌گه‌یه‌نرایه‌ دادگا ئه‌ویش به‌هۆی ئه‌وه‌ی که‌ له‌و ماوه‌یه‌دا خوێندنه‌که‌ی ته‌واو کردبوو.

 پێشتر وه‌زیری کاروباری خوێندن یان بیۆرکلوند له‌سه‌ر پرسی نیقاب و ڕووپۆش له‌ فێرگاکاندا داوای یاسایه‌کی تایبه‌تی کردبوو که‌ نیقاب و سه‌رپۆشی ئاودامان قه‌ده‌غه‌ بکرێت. به‌ڕای نوێنه‌رایه‌تی دژ به‌ هه‌ڵاواردنیش به‌ڵێ حاڵه‌ت هه‌یه‌ که‌ ده‌بێت ڕووپۆشی ئاودامانی تێدا قه‌ده‌غه‌ بکرێت به‌ڵام هه‌ر حاڵه‌ت و که‌سێک ده‌بێت هه‌ڵسه‌نگاندنی تایبه‌تی بۆ بکرێت واتا نابێت یاسایه‌کی گشتگیر له‌م بواره‌دا هه‌بێت. 

- ده‌که‌وێته‌ سه‌ر ئه‌وه‌ی ئه‌و بوار و ڕشته‌یه‌ چییه‌ که‌ فێرخواز ده‌ی خوێنێت، کاتری لینا له‌ نوێنه‌رایه‌تی دژ به‌ هه‌ڵاواردنه‌وه‌ ده‌ڵێت، بۆ نموونه‌ گه‌ر که‌سێک له‌ بواری تاقیگه‌ و پشکنیندا بخوێنێت ئه‌وا به‌هۆکاری ئه‌منییه‌وه‌ ناکرێت فێرخواز ده‌موچاوی داپۆشراو بێت، به‌ڵام بۆ نموونه‌ له‌ حاڵه‌تی ئه‌م ژنه‌ی ستۆکهۆلمدا به‌س بوو که‌ مامۆستاکه‌ی ده‌موچاوی ببینێت به‌ڵام به‌شێوه‌یه‌ک که‌ فێرخوازه‌ پیاوه‌کانی تر نه‌یبینن، به‌و شێوه‌یه‌ ڕووپۆشه‌که‌ی کێشه‌ نه‌بوو له‌به‌رده‌م خوێندنه‌که‌یدا.

جێی ئاماژه‌یه‌ که‌ یاسای تایبه‌ت به‌ هه‌ڵاواردن بۆ به‌رگرتنه‌ له‌ هه‌ڵاواردن به‌هۆی جیاوازی ڕه‌گه‌ز واتا ژن و پیاو بوون، جیاوازی نه‌ته‌وایه‌تی و ئاینه‌وه هه‌روه‌ها هه‌ڵاواردن به‌هۆی سست ئه‌ندامی و باری جنسییه‌ و ته‌مه‌نه‌وه‌. ئه‌م یاسایه‌ هه‌موو بواره‌کانی کۆمه‌ڵگا و گرووپه‌کانی ده‌گرێته‌وه‌. بڕیار‌ی نوێنه‌رایه‌تی هه‌ڵاواردنش بۆ قه‌ده‌غه‌کردنی هه‌ڵاواردن به‌هۆی ڕووپۆشه‌وه‌ بڕیارێکی نوێیه‌ که‌ بۆ ئه‌م یاسایه‌ زیاد کرا.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".