مه‌ید ئین سویدن

"مه‌ید ئین سویدن" بۆ پیشه‌سازیی هه‌نارده‌ی سوید واتای فرۆشی کوالیته‌ بووه‌. به‌ڵام ده‌کرێ گفتوگۆکه‌ له‌ سه‌ر ئه‌وه‌ بێ که‌ ئه‌م به‌رهه‌مه‌ سویدیانه‌ چه‌ند دانه‌ن. ده‌زگای حوکوومه‌تیی کۆممرش‌کوللێگیووم (Kommerskollegium) که‌ ئه‌رکی سیاسه‌تدانانی بازرگانیی ده‌ره‌وه‌ی سویدی به‌ ئه‌ستۆوه‌یه‌ شیکارییه‌کی ئه‌نجام داوه له‌ سه‌ر ناوه‌رۆکی هه‌نارده‌کان و ئه‌وه‌ی چۆن ئوتومبیلێکی وه‌ک ساب یا ڤۆڵڤۆ، به‌ سویدی داده‌نرێ. ‌هێنریک ئیساکسۆن یه‌کێ له‌و شیکارانه‌یه‌ که‌ ‌ئه‌م ڕاپۆرته‌ی ئاماده‌ کردووه‌ ده‌ڵێ له‌ بواری پیشه‌سازیی ئوتومبیلی مۆتۆڕداردا، نیوه‌ی هه‌نارده‌کان له‌ خزمه‌ته‌ سه‌رمایه‌گوزاریکراوه‌کان و کاڵاهاورده‌کانه‌وه‌ پێک دێ.

ڤۆڵڤۆی کارخانه‌ی یۆتێبۆری له‌ ڕاستیدا کاڵایه‌کی نیوه‌سویدییه. نیوه‌ی گشت هه‌نارده‌ی سوید له‌ به‌رهه‌می سه‌رجه‌می نه‌ته‌وه‌یی ـ BNP ـ پێک هاتووه‌. که‌چی بێت و سه‌رنج بدرێته‌ یه‌ک له‌ سه‌ر سێی هه‌نارده‌کانی سوید، ئه‌وا له‌ کاڵای هاورده‌ دروست کراون، بۆیه‌ش نرخی به‌رهه‌مه‌ هه‌نارده‌کان 31 له‌سه‌د داده‌شکێ. ئه‌وه‌ش دیاره‌ ده‌رئه‌نجامی تایبه‌تی خۆی لێ ده‌که‌وێته‌وه‌. هێنریک ئیساکسۆن ده‌ڵێ ئێمه‌ په‌سنی مانای هه‌نارده‌کانمان ده‌ده‌ین و هاوکاتیش هاورده‌ش به‌ سووک داده‌نێین و گرنگیی پێوه‌ندیی نێوان هاورده‌ و هه‌نارده‌ فه‌رامۆش ده‌که‌ین.

"دابه‌شکردن"، له‌م ناوه‌دا ده‌ربڕینێکه‌ به‌ مانای ئه‌وه‌ی شیرکه‌ته‌ سویدییه‌کان ئه‌مڕۆ زیاتر له‌ ڕابردوو پارچه‌ و که‌ره‌سته‌ی پێویستی به‌رهه‌مه‌کانیان له‌ ده‌ره‌وه‌ی وڵات ده‌کڕن یا خود له‌ سه‌ر به‌رهه‌مهێنانیان سه‌رمایه‌گوزاری ده‌که‌ن. به‌جۆرێک که‌ مرۆڤ پێی وایه‌ ئه‌م هاورده‌یه‌ زۆرتر له‌و وڵاتانه‌وه‌ دێ که‌ مه‌سره‌فی به‌رهه‌مهێنانه‌که‌ی زۆر نز‌مه‌ وه‌ک چین و وڵاتانی تری ئاسیایی به‌ڵام به‌ پێچه‌وانه‌وه‌ 85 له‌سه‌دی ئه‌م هاوردانه‌ی شیرکه‌ته‌ سویدییه‌کانی بواری هه‌نارده‌، له‌و وڵاته‌ نزیکانه‌وه‌ دێ که‌ ئاستی خه‌رجی به‌رهه‌مهێنانه‌که‌ی زۆر له‌ سه‌رێیه‌. به‌ڵام ئاخۆ بۆ وایه‌؟

هێنریک ئیساکسۆن ده‌ڵێ وڵاتانی وه‌ک چین که‌ مه‌سره‌فی به‌رهه‌مهێنانیان که‌مه‌، له‌ ڕاستیشدا خه‌رجییه‌کانیان که‌مه‌. بۆیه‌ش بێت و کاڵایه‌کی زۆریش له‌وێوه‌ بێت، ئه‌وا خه‌رجییه‌که‌ی هه‌رزۆر که‌م ده‌بێ. به‌ڵام زۆرترین به‌شی کاڵاکانی سه‌رمایه‌گوزاریکراوی سوید و خزمه‌ته‌کانی له‌ ئه‌ڵمانه‌وه‌ دێن، دواتر له‌ نه‌رویژ و چین. 

له‌ گوێن ده‌زگای حوکوومه‌تیی سوید بۆ سیاسه‌تدانانی بازرگانیی ده‌ره‌وه‌ش‌، هه‌نارده‌ی خزمه‌ته‌ سوید‌ییه‌کان به‌ هند ناگیرێن و 36 له‌سه‌دی بایی هه‌نارده‌کان پێک دێنن. یه‌کێک له‌ ده‌ره‌نجامگه‌لی ئه‌و سیاسه‌ته‌ی سوید بۆ بازرگانیی ده‌ره‌وه‌ش هه‌ر ئه‌وه‌یه‌. هێنریک ئیساکسۆنی شرۆڤه‌کار ده‌ڵێ دانوستاندنه‌ نێونه‌ته‌وه‌ییه‌کان له‌ سه‌ر ئازادکردنی بازرگانیی کاڵاکان ده‌بێ هاوکات بن له‌گه‌ڵ ئازادکردنی بازرگانیی خزمه‌ته‌کان چونکه‌ ئه‌م دووه‌ گرێدراوی یه‌کترن. له‌بیرمان نه‌چێ که‌ خزمه‌ته‌کان گرنگتر له‌وه‌ن که‌ ئێمه‌ بیری لێ ده‌که‌ینه‌وه‌.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".