سه‌فه‌ر بۆ یارسان، له‌گه‌ڵ عه‌لی ئه‌کبه‌ر مورادی

ئوستاد عه‌لی‌ ئه‌کبه‌ر مورادی، ‌ژه‌نیار و مامۆستای مه‌قاماتی ته‌مووره‌ی کوردانی یارسان، ئێستا له‌ ستۆکهۆڵمه‌ و سبه‌ینێ ئێواره‌ له‌ کۆنسێرتێکدا له‌ شوێنی فێرگه‌ی به‌رزی موزیکی ستۆکهۆڵم، kungliga musikhögskolan، هاوڕێی ئاره‌ش مورادی و ڕه‌زا سامانی, به‌شداران ده‌به‌نه‌ مه‌ڵبه‌ندی یارسانان. ڕێکخراوی دیموکراتیکی لاوانی یارسان ده‌ستپێشخه‌ری ئه‌م کۆنسێرته‌یه‌.

مورادی له‌دایکبووی ١٩٥٧ه‌ له‌ ئێڵی گۆرانی کرماشان‌. له‌ شه‌ش ساڵییه‌وه‌ ژه‌نینی ته‌مووره‌ی ده‌ست پێکرد و له‌ ده‌ ساڵیدا وه‌ک ژه‌نیاری ته‌واوی ته‌مووره‌ ناوی ده‌رکرد هه‌رچه‌ند دواتریش له‌ به‌ره‌ی هونه‌ریی مامۆستایان سه‌ید وه‌لی حوسه‌ینی و سیه‌د محه‌مه‌د عه‌له‌وی و هه‌ندێ ئوستادی به‌ده‌نگوناوی تری ته‌مووره له‌ کرماشانی چنییه‌وه‌ و له‌ ته‌مه‌نی سی ساڵیدا هه‌ر ٧٢ مه‌قامی ته‌مووره‌ی یارسان فێر بوو. مورادی له‌ ساڵی ١٩٧١ه‌وه‌ ژیانی پیشه‌یی خۆی ده‌ست پێ کرد و تا ئێستا گه‌لێ خه‌ڵاتی له‌ فستیڤاله‌ جۆراوجۆره‌کان وه‌رگرتووه‌ و شێوازی تایبه‌تی خۆی له‌ ژه‌نینی ته‌مووره‌دا هه‌یه‌.

مورادی، دوێنێ میوانی ناسری سینا له‌ ستۆدیۆی زایه‌ڵه‌ بوو!

له داهاتوویه‌کی نزیکدا وتووێژێکی تێر وته‌سه‌ل له‌گه‌ڵ مامۆستا مورادی بڵاو ده‌بێته‌وه‌ که‌ تێیدا بۆ وێنه‌‌ گرنگیی مه‌قاماتی ته‌مووره‌ له‌ ئایینی یارساندا باسی لێوه‌ ده‌کرێ.