گونیللا کارلسۆن، وه‌زیری کۆمه‌کی سوید. وێنه‌: سکانپیکس

سوید پاره‌ی کۆمه‌ک به‌ وڵاتانی له‌حاڵی گه‌شه‌ندن، ده‌داته‌ باڵوێزخانه‌کانی خۆی

وه‌زاره‌تی ده‌ره‌وه‌ی سوید له‌لایه‌ن ڕێکخراوی هاوکاریی ئابووری و گه‌شه‌وه‌‌ (OECD) ڕه‌خنه‌ی لێ ده‌گیرێ که‌ هه‌ندێ له‌ باڵوێزخانه‌کانی له‌ وڵاتانی ئه‌ورووپایی و هه‌ندێ شوێنی دیکه‌ی جیهانیش به‌ پاره‌ی کۆمه‌ک (biståndspengar)، به‌ڕێوه‌ ده‌به‌ن و ئه‌مه‌ دژی یاساکانی نێونه‌ته‌وه‌ییه‌.

به‌شی ناوه‌ندیی ده‌نگوباسی ڕادیۆی سوید له‌ پایزی ڕابردوودا باسی له‌وه‌ کرد که‌ چلۆن باڵوێزخانه‌کانی سوید بۆ نموونه‌ له‌ پاریس و مادرید به‌ میلیۆن پاره‌یان ده‌درێتێ له‌و بودجه‌یه‌ی حوکوومه‌ت بۆ کۆمه‌ک به‌ وڵاتانی له‌حاڵی گه‌شه‌سه‌ندن ته‌رخانی کردووه‌، له‌حاڵێکدا که‌ ئه‌م باڵوێزخانانه‌ هه‌ر هیچ کارێکی ڕاسته‌وخۆ هاوپه‌یوه‌ند له‌گه‌ڵ ئه‌م کۆمه‌که‌دا ناکه‌ن.

ئه‌م ده‌نگه‌ هی ئه‌و کاته‌یه‌ که‌ به‌رنامه‌ی کۆنفلیکتی که‌ناڵی یه‌کی ڕادیۆی سوید له‌ پایزی ڕابردوودا ته‌له‌فۆنی بۆ بالوێزی سوید له‌ مادرید کرد بۆ ئه‌وه‌ی بزانێ که‌ ئاخۆ له‌وێ به‌ چ شێوه‌یه‌ک له‌گه‌ڵ پرسی گه‌شه‌ کار ده‌که‌ن.

باڵوێزی سوید له‌ مادرید گوتی:‌ مه‌به‌ستت چییه‌؟ چۆن پێناسه‌‌ی گه‌شه‌ی هاوکاری ده‌که‌یت له‌ ئیسپانیا؟ چۆن گه‌شه‌ی هاوکاری چه‌مکێکی کۆنه‌ که‌ ئێمه‌ بۆ ئه‌و کارانه‌ی له‌ ئه‌فریقا ده‌یکه‌ین به‌کاری دێنین. 

هۆی ئه‌م کاره‌ ئه‌وه‌ بوو که‌ وه‌زاره‌تی ده‌ره‌وه، هه‌موو ساڵێ نزیکه‌ی 38 میلیۆن کرۆن له‌و‌ بودجه‌یه‌ی بۆ کۆمه‌ک به‌ وڵاتانی دواکه‌وتوو دیاری کراوه، ده‌داته‌ باڵوێزخانه‌کانی له‌ بۆ نموونه‌ ره‌یکیاویک‌، مادرید و به‌رلین هه‌رچه‌ند هه‌ر کاریشیان به‌ پرسی کۆمه‌که‌وه‌ نه‌دراوه‌.

وه‌زاره‌تی ده‌ره‌وه‌ هۆی ئه‌م کاره‌ی وه‌ها پاساو ده‌داته‌وه‌ که‌ باڵوێزخانه‌کان به‌ پرسی گه‌شه‌ و به‌ دیالۆگی کۆمه‌ک و ڕاپۆرتدانه‌وه‌ خه‌ریک ده‌بن، به‌ڵام باڵوێزی سوید له‌ پاریس ئاگای له‌م شته‌ نه‌بوو کاتێ له‌ نۆڤه‌مبه‌ری ساڵی ڕابردوودا ته‌له‌فۆنمان لێ کرد. 

ئێمه‌ جاروبار ڕاپۆرت له‌سه‌ر هاوکاریی گه‌شه‌ی فه‌رانسه‌ ده‌نووسین به‌ڵام هیچ کۆمه‌کێک به‌ فه‌رانسه‌ ناکه‌ین.لێی ده‌پرسرێ که‌ ئایا به‌ جۆرێک له‌ جۆره‌کان به‌ پرسی گه‌شه‌وه‌ خه‌رک ده‌بن؟ ده‌ڵێ نا. ناتوانین بڵێین که‌ وه‌ها کارێک ده‌که‌ین.

ئێستا ڕێکخراوی هاوکاریی ئابووری و گه‌شه‌ (OECD) ڕه‌خنه‌ی له‌ وه‌زاره‌تی ده‌ره‌وه‌ گرتووه‌ که‌ ئه‌و سیستێمه‌ی وه‌زاره‌تی ده‌ره‌وه‌ به‌کاری دێنێ که‌ تێیدا هه‌موو ساڵێ پێنج له‌سه‌دی بودجه‌ی هه‌ندێ باڵوێزخانان به‌ پاره‌ی کۆمه‌که‌وه‌ دابین ده‌کات شتێکی گۆتره‌ و له‌خۆوه‌یه‌ و ده‌بێ چاوی پێدا بخشێنرێته‌وه‌. ئه‌مه‌ ئه‌و نامانه‌ ده‌ریده‌خه‌ن که‌ له‌نێوان وه‌زاره‌تی ده‌ره‌وه‌ی سوید و ڕێکخراوی هاوکاری و گه‌شه‌ی ئابووری گوازراوه‌ته‌وه‌ و به‌شی ناوه‌ندی ده‌نگوباسی ڕادیۆ سویدیش ده‌ستی به‌هه‌ندێکیان ڕاگه‌یشتووه‌. یولیا بێن، له‌ ڕێکخراوی هاوکاری و گه‌شه‌ ئه‌مه‌ ده‌سه‌لمێنێ.

ڕێکخراوی (OECD) له‌ نامه‌گوازتنه‌وه‌کانیدا له‌گه‌ڵ وه‌زاره‌تی ده‌ره‌وه‌ی سوید ئه‌مه‌ وه‌بیر دێنێته‌وه‌ که‌ پاره‌ی دیاریکراو بۆ کۆمه‌ک به‌ وڵاتانی له‌حاڵی گه‌شه‌دا نابێ بۆ دابینکرددنی چالاکیی ئاسایی دیپلۆماتیک به‌کاربهێنرێن و داوای ده‌که‌ن که‌ وه‌زاره‌تی ده‌ره‌وه‌ی سوید ڕوونی بکاته‌وه‌ که‌ باڵوێزخانه‌کانی له‌ ڕاستیدا چه‌نده‌ به‌ کاروباری کۆمه‌که‌وه‌ خه‌ریک ده‌بن.

گونیللا کارلسۆن وه‌زیری کۆمه‌کی سوید ده‌ڵێ که‌ ئێمه‌ ده‌بێ مه‌رجه‌کانمان له‌سه‌ر باڵوێزخانه‌کانمان له‌ وڵاتانی ئه‌ورووپاییدا توندکه‌ینه‌وه‌ که‌ چلۆن له‌ بواری سیاسیدا له‌گه‌ڵ ئه‌م ئه‌رکی کۆمه‌که‌ بۆ هاوکاریی نێونه‌ته‌وه‌یی‌ ده‌جووڵێنه‌وه‌. بۆیه‌ش بڕیارمان داوه‌ که‌ به‌شێکی ئه‌م بودجه‌یه‌ بۆ وه‌ها چالاکییه‌ک ته‌رخان بکرێ. بێت و ئه‌و ئه‌رکه‌ به‌جێ بهێنرێ ئه‌وا کاری ژمێریاریش بۆ ئێمه‌ ئاسان ده‌بێته‌وه‌. 

گونیللا کارلسۆن گوتی به‌م حاڵه‌وه‌ حوکوومه‌تی سوید به‌ته‌مایه‌ له‌مه‌ولا ڕوانگه‌کانی ڕێکخراوی هاوکاری و گه‌شه‌ له‌به‌ر چاو بگرێ.

هه‌ر له‌م پێوه‌ندییه‌دا ئه‌مڕۆ ڕێکخراوی "ئه‌کشن ئه‌ید" بۆ کۆمه‌ک داوای له‌ حوکوومه‌تی سوید کردووه‌ که‌ سه‌رمایه‌گوزارییه‌کانی خۆی به‌ پاره‌ی دیاریکراو بۆ کۆمه‌ک به‌ وڵاتانی له‌حاڵی گه‌شه‌دا، له‌و شیرکه‌تانه‌دا ڕابگرێ که‌ بۆ ڕاکردن له‌ باج، له‌ سوید گواستوویانه‌ته‌وه‌ ده‌ره‌وه‌. بۆ نموونه‌ سویدفه‌ندی سه‌ر به‌ ده‌وڵه‌ت که‌ ده‌بێ پاره‌ی کۆمه‌ک له‌ وڵاتانی له‌حاڵی گه‌شه‌دا سه‌رمایه‌گوزاری بکا، نزیکه‌ی نه‌وه‌د میلیۆن کرۆنی له‌ شیرکه‌تی په‌ن‌ئه‌فریکا له‌ تانزانیادا سه‌رمایه‌گوزاری کردووه‌ له‌ زیاتر له‌ سه‌د میلیۆن کرۆنی له‌ سوودی باجلێنه‌دراو بۆ به‌هه‌شتی باج ناردووه‌ تا خۆ له‌ باجدان بدزێته‌وه‌. ئه‌مه‌یان ڕێکخراوی ئه‌کشن‌ئه‌ید له‌ ژماره‌ی ئه‌مڕۆی ڕۆژنامه‌ی داگێنزنیهێتردا لێی دواوه.‌

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".