Foto: Scanpix. Montage: Sveriges Radio

سۆسیالدیموکراته‌کان هه‌ڵوێستیان له‌سه‌ر پرسی لیبیا گۆڕیوه‌

هۆکان یوهۆلت سه‌رۆکی سۆسیالدیموکراته‌کان نیوه‌ڕۆی ئه‌مرۆ له لێدوانێکی ڕۆژنامه‌وانیدا هه‌ڵویستی خۆی و پارته‌که‌ی سه‌باره‌ت به‌ به‌شدارییه‌ سه‌ربازییه‌کانی سوید له‌ لیبیا ‌ ڕاگه‌یاند. یوهولت ده‌ڵێت ئێمه‌ سورین له‌سه‌ر ئه‌وه‌ی که‌ هێزه‌ ئاسمانییه‌کانی سوید له‌ لیبیا پاش 30 یونی ئیتر کۆتای پێ بێت. له‌بری ئه‌وه‌ سوید ده‌توانێت به‌شێوه‌ی تر به‌شدار بێت، بۆ نموونه‌ ناردنی هێزی ده‌رییای و فرۆکه‌ی بارهه‌ڵگر هه‌روه‌ها سوید ده‌توانێت به‌ چالاکی تر جگه‌ له‌ چالاکی سه‌ربازی پشتگیر له‌خه‌ڵکی لیبیا بکات به‌ڕای یوهۆلت.

له‌سه‌ر ئه‌م وته‌یه‌ی یوهۆلت وه‌زیری ده‌ره‌وه‌ی سوید کارل بیلدت ده‌ڵێت هیچ لایه‌نێک داوای هێزی ده‌رییای نه‌کردووه‌ و گه‌ر بێت و دوای کۆتایی یونی داوای به‌شداری سوید بکرێت ئه‌وا داوا له‌سه‌ر به‌شداری به‌ هێزی ئاسمانییه‌ .

هه‌ڵوێستی سۆسیالدیموکراته‌کان پێش هه‌فته‌یه‌ک له‌سه‌ر ئه‌م پرسه‌ جیاواز بوو کاتێک سه‌رۆکی پارته‌که‌یان هۆکان یوهۆلت وتی پێویست ناکات سوید ماوه‌ی به‌شداریکردنی له‌ چالاکییه‌کان دژ به‌ لیبیا درێژ بکرێته‌وه‌. ئه‌م هه‌ڵوێست گۆڕینه‌ پرسیاری له‌سه‌ر متمانه‌ به‌ یوهۆلت ناوه‌ته‌وه‌ به‌ڵام ڤیدار ئه‌نده‌رشۆن سه‌رنوسه‌ری (Folkbladet) ده‌ڵێت ئه‌م هه‌ڵوێست گۆڕینه‌ ژیرانه‌یه‌.

هۆکان یوهۆلتی سه‌رۆکی سۆسیالدیموکراته‌کان له‌سه‌ر رۆڵی سه‌ربازیی سویدی له‌ لیبیا هه‌ڵوێستی پارته‌که‌ی وا ڕوونکرده‌وه‌ که‌ نایانه‌وێت ماوه‌ی به‌شداری سوید له‌و سێ مانگه‌ی که‌ بۆیان دیاری کراوه‌ واتا له‌ دوای 30 یونییه‌وه‌ درێژتر بکرێته‌وه‌، ئه‌گه‌رچی ڕێکخراوی نه‌ته‌وه‌یه‌کگرتووه‌کان داوای درێژکردنه‌وه‌ی به‌شدارییه‌کانی سوید بکه‌ن.

ئه‌م هه‌ڵوێسته‌ی سۆسیالدیموکراته‌کان ڕه‌خنه‌یه‌کی زۆری نایه‌وه‌ به‌تایبه‌ت له‌لایه‌ن کۆمه‌ڵه‌ی سویدیی ڕێکخراوی نه‌ته‌وه‌یه‌کگرتووه‌کان که‌ پێیان وابوو به‌رده‌وام نه‌بوونی سوید له‌چالاکییه‌کان دژ به‌ لیبیا مانای شکاندنی بنه‌ماکانی ڕێکخراوی نه‌ته‌وه‌یه‌کگرتووه‌کانه‌.

به‌ڵام ئه‌مڕۆ له وتارێکدا ‌له‌ ڕۆژنامه‌ی داگه‌نسنیهێته‌ر سۆسیالدیموکراته‌کان ده‌ڵێن با چالاکییه‌ سه‌ربازییه‌کانی سوید له‌ لیبیا پاش 30 یونیش به‌رده‌وام بێت گه‌ر ئه‌مه‌ خواستی ڕێکخراوی نه‌ته‌وه‌یه‌کگرتووه‌کان بێت.

سه‌باره‌ت به‌ هۆکاری ئه‌م هه‌ڵوێست گۆڕینه‌ی سۆسیالدیموکراته‌کان ڤیدار ئه‌نده‌رشۆن سه‌رنوسه‌ر ڕۆژنامه‌ی (folkbladet) که‌ ڕۆژنامه‌یه‌کی سۆسیالدیموکراتی سه‌ربه‌خۆیه‌ ده‌ڵێت هه‌ڵوێست گۆڕینه‌که‌ی یوهۆلت و سۆسیالدیموکراته‌کان به‌هۆی ئه‌و فشاره‌ زۆره‌وه‌ بوو که‌ بۆیان هێنرا و ده‌بوا هه‌ڵوێست بگۆڕن. ئاخر سۆسیالدیموکراته‌کان هه‌نگاوێکی هه‌ڵه‌یان نه‌بوو ده‌بوا ڕاست بکرێته‌وه‌.

جگه‌ له‌ فشاری ده‌ورووبه‌ر ئه‌نده‌رشۆن ده‌ڵێت ئه‌و هه‌ڵوێست گۆڕینه‌ ئاماژه‌ به‌ سه‌رکرده‌یه‌کی بێ ئه‌زموونه‌ واتا یوهۆلت به‌ڵام ئه‌نده‌رشۆن پێی وانییه‌ که‌ ئه‌م ڕا گۆڕینه‌ی سۆسیالدیموکراته‌کان له‌سه‌ر پرسی لیبیا له‌سه‌ر پارته‌که‌ بکه‌وێت به‌‌ پێچه‌وانه‌وه‌ ڕێز له‌و هه‌ڵوێسته‌یان ده‌گیرێت.

- من پێم وایه‌ ڤیدار ئه‌نده‌رشۆن ده‌ڵێت سه‌رۆک پارتێک که‌ بتوانێت ئاوها و سه‌باره‌ت به‌ پرسێکی گرنگی وه‌ک ئه‌وی لیبیا ڕا بدات و ڕا بگۆڕێت هه‌ڵوێستێکه‌ ده‌بێته‌ مایه‌ی ڕێز له‌داهاتوودا و ئه‌و ڕه‌خنانه‌ی ئاڕاسته‌ی سه‌رکردایه‌تی ئه‌م پارته‌ کرا له‌ ناوخۆ و ده‌ره‌وه‌ی وڵات ده‌رسێکی باشی دانێ.

به‌ڵام پێش هه‌ڵویست گۆڕینی سۆسیالدیموکراته‌کان سه‌باره‌ت به‌ لیبیا له‌ سه‌ره‌تادا بۆ له‌گه‌ڵ درێژکردنه‌وه‌ی ماوه‌ی به‌شداری سوید له‌ لیبیا نه‌بوون، به‌ پێی وتارێک له‌ گۆڤاری (Fokus) هاتووه‌ که‌ هه‌ڵه‌ تێگه‌شتنێک له‌لایه‌ن سۆسیالدیموکراته‌کانه‌وه‌ هه‌بووه‌ که‌ یوهۆلت پێی وابووه‌ به‌شدارییه‌که‌ی سوید بۆ ماوه‌یه‌که‌ و ئیتر درێژکردنه‌وه‌ی پێویست نییه‌ و گوایا وته‌بێژی سۆسیالدیموکراته‌کان له‌ پرسی هێزی به‌رگریدا پێته‌ر هولتکڤیست ئه‌و لێکدانه‌وه‌ هه‌ڵه‌یه‌ی هه‌بووه‌، هه‌ربۆیه‌ سه‌رۆک و ئه‌ندامانیش له‌گه‌ڵ درێژکردنه‌وه‌ی چالاکی سه‌ربازی فڕۆکه‌وانیی سویدا نه‌بوون.

ئێستاش که‌ هه‌ڵوێسته‌که‌یان سه‌باره‌ت به‌ پرسی لێبیا ڕاستکردۆته‌وه‌ به‌لای جێگری به‌ڕێوه‌به‌ری لیژنه‌ی پرسی هێزی به‌رگری له‌ په‌رله‌مان سیسیلیا ڤیده‌رگرێنی مۆدێرات ده‌ڵێت سۆسیالدیموکراته‌کان کارێکی باشییان کردووه‌.

- ئیتر به‌م هه‌ڵوێسته‌یان سۆسیالدیموکراته‌کانیش ده‌بنه‌ به‌شێک له‌و ڕێککه‌وتنه‌ به‌رفراوانه‌ی له‌ په‌رله‌ماندا له‌سه‌ر پرسی لێبیا هه‌یه‌، ئه‌مه‌ش ناردنی سه‌رباز و ده‌ریاوانی سویدی بۆ پارستنی ئازادی و ئاسایشی خه‌ڵکانی تر واتا له‌ لیبیا ئاسانتر ده‌کات.

تا ئێره‌ و ده‌ستخۆشی له‌ هه‌ڵوێست گۆرینه‌که‌ی یوهۆلت و پارته‌که‌ی له‌سه‌ر پرسی لیبیا به‌ڵام ئه‌م ڕاگۆڕینه‌ زه‌ره‌ری بۆ متمانه‌ به‌و پارته‌ و سه‌رکردایه‌تییه‌که‌ی هه‌یه‌ به‌ڕای وته‌بێژی پارتی گه‌لی لیبراڵ ئاللان ڤیدمان.

 - ئه‌توانم بڵێم که‌ به‌درێژایی شه‌ش هه‌فته‌ سۆسیالدیموکراته‌کان نه‌یاتوانیوه‌ و فریانه‌که‌وتوون هه‌ڵویستی خۆیان سه‌باره‌ت به‌لیبیا روون بکه‌نه‌وه‌. له‌ نێوان دوو هه‌ڵوێستدا خۆیان بۆ ساغ نه‌بۆته‌وه‌ به‌ڕای ڤیدمان هه‌ڵوێستی ئه‌وه‌ی که‌ فڕۆکه‌ سه‌ربازییه‌ سویدییه‌کان له‌ لیبیا به‌شدار بن یان نا. سۆسیالدیموکراته‌کان ده‌ڵێن هێزی سه‌ربازی فڕۆکه‌وانی چیتر گرنگ نییه‌ و له‌بری ئه‌وه‌ با هێزی ده‌ریایی بنێردرێت. ئه‌مه‌ش بێ شک ڤیدمان ده‌ڵێت متمانه‌ به‌و پارته‌ و هه‌ڵوێستیان له‌سه‌ر پرسی لیبیا له‌ق ده‌کات.

 له‌ سۆسیالدیموکراته‌کان ئوربان ئالین به‌رپرسی سیاسه‌تی ده‌ره‌وه‌ و پێته‌ر هولتکڤیست به‌رپرسی پرسه‌کانی هێزی به‌رگری له‌ وتاره‌که‌یاندا له‌ دگه‌نسنیهێته‌ری ئه‌مڕۆدا نوسیویانه‌ که‌ هێزی فڕۆکه‌وانی لیبی تێکشکێندراوه‌ و چیتر هێزی سه‌ربازی فڕۆکه‌وانی سویدی پێویست ناکات به‌ڵکه‌ ئیتر بۆ وه‌ستاندنی هێرشه‌ سه‌ربازییه‌کانی لیبیا هێزی ده‌ریایی گرنگتره‌.  هه‌روه‌ها پێیان وایه‌ که‌ باشتر وایه‌ پێکهێنانی فۆندێکی سویدی بۆ گه‌شه‌پیدانی دیموکراتی له‌ لیبیا پێک بهێنرێت.

 ئه‌م پیشنیازانه‌ی سۆسیالدیموکراته‌کان‌ زۆر سه‌یره‌ به‌لای ئالان ڤیدمانی پارتیی گه‌له‌وه‌.

 - ئه‌م پێشنیازه‌یان سه‌یره‌ و به‌جێگه‌یاندنیان کاتێکی زۆر ده‌خایه‌نێت ئه‌مه‌ جگه‌له‌وه‌ی که‌ گه‌ڕاندنه‌وه‌ی هێزی سه‌ربازی فڕۆکه‌وانی به‌ هێزی ده‌ریایی مانای هێنانه‌وه‌ و گه‌ڕانه‌وه‌ی هێزه‌ سه‌ربازییه‌ سویدییه‌کانه‌ کارێک که‌ خه‌رجییه‌کی زۆری تێ ده‌چێت.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".