1 av 2
wêne: Foto: Bela Szandelszky/Scanpix
2 av 2
ماریا له‌یسنر

باری ناله‌باری په‌روه‌رده‌ی منداڵانی قه‌ره‌ج له‌ سویددا

نه‌خوێنده‌واری له‌ ناو منداڵانی ڕۆمه‌نیدا
5:27 min

له‌ به‌رنامه‌ی ئه‌مڕۆی زایه‌ڵه‌دا بۆ نموونه‌ له‌سه‌ر بابه‌تێکی‌ گرانهه‌زم له‌ سیاسه‌تی په‌روه‌رده‌ی سویدیدا ده‌دوێین که‌ ده‌گوترێ ته‌نانه‌ت له‌ وڵاتێکی پاشکه‌وتووشدا به‌م‌ خراپییه‌ نییه‌. چیرۆکه‌که‌ ئه‌م بارودۆخه‌ی منداڵانی رۆمه‌نی (قه‌ره‌ج) له‌ فێرگه‌کانی سوید ده‌گرێته‌وه‌‌ که‌ توێژه‌ری خودی حوکوومه‌ت له‌م پرسه‌دا، ماریا له‌یسنر، وه‌ها به‌ ناله‌باری وه‌سف ده‌کا.

حوکوومه‌تی سوید ئێستا ده‌ست به‌کار بووه‌ بۆ دانانی ستراتیژییه‌کی تایبه‌ت بۆ ڕۆمه‌نییه‌کان و ئێریک ئوللنهاگ وه‌زیری هاوگونجی، ئینتگراشون ده‌ڵێ ئه‌م سه‌رمایه‌گوزارییه‌ ته‌نیا ئاراسته‌ی ئه‌م گرووپه‌ ده‌کرێت‌.

ئوللنهاگ ده‌ڵێ: "ده‌توانم به‌ڵێنیی ئه‌وه‌ بده‌م که‌ ئێمه‌ دیسان زنجیره‌ هه‌وڵێکمان بۆ به‌رزکردنه‌وه‌ی گرووپی ڕۆمه‌نییه‌کان له‌به‌رچاو گرتووه و باسی جوداڕه‌فتاریی ئه‌رێنی ناکا واتا (positiv särbehandling)‌. به‌ڵام ئێمه‌ پێویستیمان به‌ سه‌رمایه‌گوزارییه‌ک هه‌یه‌ که‌ به‌ته‌نێ ئاراسته‌ی رۆمه‌نییه‌کان بکرێ، چونکه‌ ئه‌م گرووپه‌ به‌ جارێکی که‌وتۆته‌ په‌راوێزه‌وه‌. ئه‌وه‌ی که‌ ورده‌کاریی هه‌وڵه‌کانی ئێمه چی ده‌بن جارێ باسی لیوه‌ ناکه‌ین تا ئه‌و کاته‌ی له‌ دیوانخانه‌ی حوکوومه‌تدا به‌ته‌واوی له‌سه‌ریان ساغ ده‌بینه‌وه‌. "

بودجه‌یه‌کی تایبه‌تی ده‌وڵه‌تی که‌ کۆمۆنه‌کان بۆ کاری به‌رده‌وامیی په‌ره‌وه‌رده‌ی منداڵانی ڕۆمه‌نی له‌ فێرگه‌کاندا وه‌ریگرن.‌ ئه‌مه‌ یه‌کێ له‌و پێشنیازه‌ سه‌ره‌کییانه‌ بوو که‌ توێژه‌ری ده‌وڵه‌ت هاوینی ڕابردوو پێشکه‌شی کرد ئه‌ویش پاش ئه‌و وێنه‌ تاریکه‌ی له‌ بارودۆخی ناله‌باری منداڵانی قه‌ره‌ج، به‌تایبه‌ت له‌ فێرگه‌کاندا دایه‌ دست.

خاتوو روزێنا هورڤات، وه‌ک مامۆستای تایبه‌تی یارمه‌تیده‌ر له‌ فێرگه‌ی کریدگۆرد له‌ روسنگۆردی مالموێ کار ده‌کا و شه‌ش قوتابیی ڕۆمه‌نیی لێیه‌. ئه‌و خۆشی به‌ڕه‌گه‌ز قه‌ره‌جه‌ و جگه‌ له‌ یارمه‌تیدانی ده‌رسیی ئه‌و منداڵانه و بواری په‌روه‌رده‌یان، ئاگای له‌ چه‌ندێتیی غایببوونه‌کانیشیان هه‌یه‌. بێت و که‌سێک نه‌یه‌ته‌وه‌، ئه‌وا هه‌ر به‌ ته‌له‌فۆنی خۆی زه‌نگیان بۆ لێده‌دا.

ئه‌و ده‌ڵێ: بێت و لێره‌ له‌ مه‌دره‌سه‌وه‌ ته‌له‌فۆن بکرێ، ئه‌وا له‌وانه‌یه‌ جواب نه‌ده‌نه‌وه‌ که‌چی کاتێ زانیان ته‌له‌فۆنی منه‌ و ئه‌وه‌ منم ته‌له‌فۆن ده‌که‌م، ڕه‌نگه‌ هه‌ندێ ئاسانتر ‌بێت و قسه‌م له‌گه‌ڵ بکه‌ن.

به‌ڕێوه‌به‌ری فێرگه‌ی کریدگۆرد، بریت ـ ماری کاراشین ده‌ڵێ ئه‌وه‌ی مامۆستایه‌کی تایبه‌تی یارمه‌تیده‌رمان دامه‌زراندووه‌ که‌ خۆی به‌ڕه‌گه‌ز ڕۆمه‌نییه‌، زۆر باش و به‌سوود بووه‌.

خاتوو کاراشین ده‌ڵێ هه‌بوونی ئه‌و، یه‌کجار زۆر بۆ قوتابیانی ڕۆمه‌نی باش بووه‌، ئه‌و بۆته‌ نموونه‌یه‌ک بۆیان. دایکوباوکی ئه‌و منداڵانه‌ش بڕوایان به‌ فێرگه‌که‌ به‌هێزتر بووه‌ و ده‌زانن که‌سێک هه‌یه‌ ڕووی تێکه‌ن!

ئه‌و زنجیره‌ هه‌وڵانه‌ش که‌ بۆ سه‌رمایه‌گوزاریی تایبه‌ت له‌ بواری په‌روه‌رده‌ی منداڵانی ڕۆمه‌نیدا پێشنیار کراون و به‌ پاره‌ی له‌به‌رچاوگیراوی ده‌وله‌ت به‌ڕێوه‌ ده‌چن به‌ گرنگ وه‌رگیراون به‌ڵام هێشتا وه‌رزی هه‌ڵسه‌نگاندنیان له‌ سه‌ر عه‌رزی واقیعدا نه‌هاتووه‌.

حوکوومه‌ت ده‌ڵێ ستراتیژیی ڕۆمه‌نییه‌کانی خۆی له‌ کۆتایی ئه‌مساڵدا یا خود سه‌ره‌تای ساڵی داهاتوودا ئاماده‌ ده‌کات.که‌چی خاتوو ماریا له‌یسنر توێژه‌ری تایبه‌تی حوکوومه‌ت له‌ پرسی ڕۆمه‌نییه‌کاندا ده‌ڵێ ڕاپه‌ڕی حوکوومه‌ت ده‌بێ هه‌رچی زووتر ده‌ست پێ بکات و په‌له‌ی لێ بکرێ. ئه‌و ده‌ڵێ ئه‌م باره‌ ناله‌باره‌ ته‌نانه‌ت له‌ هی وڵاتێکی پاشکه‌وتووش خراپتره‌.

له‌یسنر ده‌ڵێ: ئه‌و لێوه‌کۆڵینانه‌ی له‌ چه‌ندین کۆمۆندا کردوومانن ده‌ریده‌خه‌ن که‌ ئه‌وه‌ ته‌نیا که‌مینه‌یه‌کی منداڵانی ڕۆمه‌نییه‌ که‌ له‌ڕاستیدا ده‌چنه‌ مه‌دره‌سه‌. ئه‌مه‌ شکستێکی گه‌وره‌یه‌ بۆ که‌مه‌ڵگاکه‌مان. له‌وه‌ ناگه‌م، ئاخر چلۆن ئه‌وه‌نده‌ خێرا به‌رفره‌ بۆته‌وه‌ و که‌س هه‌ستی به‌ مه‌ترسیش نه‌کردووه‌؟

ماریا له‌یسنر سه‌رۆکی شاندی تایبه‌تی حوکوومه‌ت له‌ پرسی ڕۆمه‌نییه‌کاندا زیاد ده‌کا و ده‌ڵێ ئه‌مه‌ ڕه‌گه‌زپه‌رستییه‌که‌ی به‌ ستروکتوورکراوه‌ له‌ سویددا دژی ئه‌و منداڵه‌ قه‌ره‌جانه‌ی که‌ هیچ کام له‌  به‌ڕێوه‌به‌رانی فێرگه‌، به‌رپرسانی کۆمۆن و پشکنه‌رانی حوکوومه‌ت به‌ هیندیان نه‌گرتوون و ئه‌مه‌ کاره‌ساتێکه‌ بۆخۆی‌.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".