Foto: TT

Zerfa porteqalî bi heşt zimanan tê

Zanyariyên teqawîdiyê
5:20 min

Meqamê teqawîdiyê îsal giringiyeke taybet dide zanyariyên bi zimanên din. Kampanyayek bi mesref ya pirzimanî hatiye amade kirin. Şefê danûstandinê yê meqamê teqawîdiyê Sten Eriksson dibêje ew dixwazin agahiyê bidine kesên temenmezin ku hatine Swêdê.

– Pereyên teqawîdiyê yên kesên ne li Swêdê ji dayik bûne bi navincî ji yên li Swêdê çêbûne kêmtir in. Ji ber ku ew hem li Swêdê kêmtir mane hem jî bêkarî di nav wan de zêdetir e. Yanî xetera ku teqawîdiya wan kêm be pirtir e û lewra em dixwazin xwe bigihînine wan.

Di ber marşa neteweyî ya Swêdê re bang li guhdêr tê kirin ku bi mebesta wergirtina zanyarî û agahiyan ew telefonê bide meqamê teqawîdiyê (pensionsmyndigheten) yan jî serdana malperê bike. Agahiyên di kampanyayê de bi heşt zimanên cuda ne û fîlmê reklama kampanyayê bi sê zimanan; bi erebî, farisî û spanî ye.

– Bi me danînan têkiliyê girîng e û em dixwazin nîşan bidin ku ji bo wergirtina alîkariyê mirov dikare bi me re pêwendiyê deyne.

Hejmara kurdên li Swêdê bilind e û bi pêşveçûnên van salên dawî re bi taybetî ji rojavayê Kurdistanê gelek penaberên nû yên kurdîaxêv xwe li Swêdê digrin. Li dezgehên resmî yên Swêdê mîna Daîreya Koçê, Daîreya Bêkariyê, agahiyên wezareta tenduristiyê û Radyoya Swêdê agahiyên girîng tim bi kurdî jî têne dayin. Lê kurdî nîne çima gelo? 

– Em li gor temsîlkariyê çûne, ango bê hejmara axavtvanan çiqas e û yên pir têne axavtin hatine hilbijartin. 

Lê gava mirov berê xwe dide lîsteyê hin zimanên tê de tê zanîn ku ji kurdî kêmtir têne axavtin, wek nimûne tirkî û polonî. Lewra ez meraq dikim bê çi statîstîk mîna çavkanî hatiye bi kar anîn?

– Ez nizanim kîjan statîstîk me bi kar aniye, lê buroyeke wergerê ya ku bi karên wiha re mijûl e alîkariya me kiriye.

Em dîsa vegerine ser babeta xwe ya naveroka zerfa porteqalî û agahiyên nû. Carê li gor bê eger mirov 40 salî li Swêd bijî hesabek dihate kirin bê di teqawîdiyê de mirov dê çiqasî bistîne. Lewra hingî hesabê ku dihate kirin û miaşê ku gelek teqawîdan distand li hev der nediket. Ya ku dihate standin kêmtir bû ji ber ku ew kêmtir li Swêdê jiya bûn. Lê ji îsal û pê de hesab wê ne li gorî 40 salî were kirin. Wê bê texmînkirin bê heta teqawîdiyê mirov çend salan kar kiriye û meblexek li gor wê dê were nivîsandin. Sten Eriksson:

– Ew ên ku 40 salê wan li Swêdê neqediyaye mafê wan yê standina teqawîdiya garantiyê (garantipension) nîne. Berê di zerfa porteqalî de ev yek nedihate nivîsandin û agahiyên ji wan kesên kêmtir li Swêdê mane şaş bûn. Pêşbîniyek ji heqê wan bilindtir dihate diyar kirin.

Kesên ku li welatekî din çêbûne, kar kirine û piştre hatine Swêdê eger mafê wan yê wergirtina teqawîdiyê li welatê ku jê hatine hebe heqê wan heye wê bistînin. Ji bo wergirtina teqawîdiya derve Meqamê Teqawîdiya Swêdê dikare alîkariyê bide û pêwendiyan deyne, lê nikare zanyariyên karê li wira derxe holê.

Meqamê teqawîdiyê ji aliyekî din ve jî karmendên pirzimanî perwerde kiriye da di hevdîtinên rûbirû yên li Stockholm, Göteborg û Malmö de bi zimanê xelkê bi wan re bipeyivin. Eger mirov bide ber par re îsal mesrefa ku li kampanyaya zimanên din hatiye xerckirin duqat e. 3.7 mîlyon kron li kampanya zimên çûye. Û Sten Eriksson dibêje ev giringîdan wê berdewam be. 

- Ev hewldanên me wê sal bi sal berdewam bin, ji ber ku ev komeke girîng e. Bêguman hedefa me ew e em xwe bigihînin her kesî .


BESIR KAVAK
besir.kavak@sverigesradio.se


Hîmê rojnamegeriya me duristî û bêterefî ye. Radyoya Swêdê ji aliyê berjewendiyên siyasî, dînî, aborî, resmî û şexsî ve serbixwe ye.
Du hittar dina sparade avsnitt i menyn under "Min lista".