سەرچاوەکانی کاردۆزگە بەشی پەنابەران ناکات

1:21 min

ژمارەیەکی بێوێنە پەنابەری تازەهاتوو لە کاردۆزگە تۆمار کراون و ئەو دەستگەیە هۆشداریی دەدات کە سەرچاوەکانیان بەرگەی ئەو ژمارە زۆرە ناگرێت.

ئەو بارودۆخەی ساڵی 2015 دەستگە دەوڵەتییەکان بەهۆی ژمارەی زۆری پەنابەرانەوە پێیدا تێپەڕین ئێستا گەشتۆتە ئێمە، ڕۆی مێلچەرت بەرپرسی هاوگوونجی و جێگیرکردن لە بازاڕیکاردا، لە دەستگەی کۆچ دەڵێت. 

بەپێی ئاماری نوێی کاردۆزگە (Arbetsförmedlingen) لە مانگی یولی ڕابوردوو زیاد لە 76 هەزار پەنابەری تازەهاتوو واتا ئەو کەسانەی کە تازە ئیقامەیان وەرگرتووە و لە بەرنامەی هاوگوونجی و جێگیرکردن (etableringsprogram) ی کاردۆزگەدا تۆمار کراون. ئەمە بەراورد بە هەمان مانگ لە ساڵی ڕابوردوودا کە ئەو ژمارەیە 59 هەزار کەس بوو.     

جێی باسە کاردۆزگە دەمێکە هۆشداریی داوە کە ئەو پارەیەی بۆ بەرنامەی جێگیرکردنی پەنابەران لە بازاڕیکاردا تەرخان کراوە بەش ناکات. ئەو دەستگەیە داوایان لە حکوومەت کردووە کە بودجەی کاردۆزگە بۆ ساڵی داهاتوو زیاد بکرێت تا بەرگەی ئەو فشارە بگرن، لە پێشبینییان بۆ خەرجیی ساڵی داهاتوویان کاردۆزگە داوای 600 ملیۆن کردۆن زیاتر لەوە دەکەن کە حکوومەت خۆی بۆ ئامادە کردبوو. بەڵام تا ئێستا دیار نییە ئاخۆ وەڵامی حکوومەت لەسەر زیادکردنی بوودجەی کاردۆزگە چۆن دەبێت.