klassrum
وێنە: FREDRIK SANDBERG / TT

"گێچەڵی سێکسی لە فێرگە سەرەتاییەکانەوە دەست پێ دەکات"

3:19 min

tystiklassen# هەزارەها فێرخوازی قۆناغی سەرەتایی تا قۆناغی ئامادەیی دژ بە گێچەڵی سێکسی ڕاپەڕین.

لە درێژەی هەڵمەتی metoo# ڕاپەڕین و هەڵمەتی نارەزاییەکان دژ بە گێچەڵ و دەستدرێژیی سێکسی لە چەندین بواری جیاوازی کاردا بەردەوامە، ئینجا نۆبەی فێرخوازانی قۆناغی سەرەتایی تا قۆناغی ئامادەییە کە لە گروپێکی نهێنیی فەیسبووکدا بە سەدەها فێرخواز ئەزموونی خۆیان دەگێڕنەوە.

دیسا هۆرنەر فێرخوازی ئامادەیی لە شاری ڤێکخۆ دەڵێت ئەو ڕاپەڕینەی لەژێر ناوی (metoo#) دەستی پێ کردووە کارێکی زۆر باشە بەڵام بنەمای کێشەکە لەبیر کراوە، لەبەرئەوەی ئەو کێشەیە زۆر زوو لە قۆناغی فێرگا سەرەتاییەکانەوە دەست پێ دەکات هەر بۆیە گرنگە لە ئاستی فێگەکاندا باس لەو کێشەیە بکرێت و لەو قۆناگە سەرەتاییانەوە دەتوانین بەر لەو دیاردەیە بگرین، هەندێک هەڵسوکەوت و ڕەفتار بگۆڕین.

دیسا هۆرنەر باس لەو بەسەرهاتانە دەکات کە فێرخوازان گێڕاویانەتەوە، دەستبۆبردن لەلایەن هاوپۆل و هاوڕێیانەوە، قسە و توانجی نابەجێ دژ بە کچان، تا دەگاتە دەستدرێژیی سێکسیی لە توالێتی فێرگەکاندا هەروەها ئەو مامۆستایانەی خۆیان لە فێرخوازە کچەکان نزیک دەکەنەوە و کۆمێنتی سێکسییان دەدەن بەگوێدا، یاخود مامۆستای وەرزش دەچنە شوێنی دوش و خۆگۆڕینی کچان و سەیریان دەکەن.                   

- بەداخەوە سەرسوڕماو نیم لەبەرئەوەی کێشەی گێچەڵی سێکسی لە فێرگەکاندا دەمێکە هەیە و هیوادارم لەمەودوا و لە دوای ئەم هەڵمەتانەوە فێرگەکان ئەم کێشەیە بە هەند بگرن و کاری بۆ بکەن. یوان لیلی یباری لە ئەنجوومەنی وانەدان لە دەستگەی پرسی فێرگەکان دەڵێت.

یوان لیلی هەروەها دەڵێت کارمەندانی فێرگەکان ئەرکدارن کە بەر لەو دیاردەیە بگرن و ئەوەش کارامەیی دەوێت، بەرپرس لەوەی کە چاودێریی فێرگەکان بکات سەبارەت بە گێچەڵی سێکسی نوێنەرایەتیی دژ بە جوداکارییە (Diskrimineringsombudsmannen).

بەڵام لە لێکۆڵینەوەیەکی نوێی نوێنەرایەتی پرسی منداڵاندا (Barnombudsmannen) داوا کراوە کە ئەو بەرپرسێتییە بخرێتەوە لای دەستگەی پرسی فێرگەکان (Skolverket) و چاوەڕێ دەکرێت ئەو پێشنیازە ببێتە یاسا و جێبەجێ بکرێت.

گرنگی گەڕاندنەوەی ئەرکەکان بۆ یەک دەستگە بۆ نموونە لەوەدایە لەبەرئەوەی کاتێک ئەرکەکان دابەش دەبێت بەسەر دوو دەستگەی جیاوازدا مەترسیی ئەوە هەیە لێکۆڵینەوە لەو جۆرە کێشانە لە دۆسییەی لێکۆڵینەوەکاندا بمێینەوە و چارەسەر نەبن. کارل لیند لە نوێنەرایەتی دژ بە جووداکاریی دەڵێت.

وەزیری خوێندن گوستاڤ فریدولین سەبارەت بە کێشەی کێچەڵی سێکسیی لە فێرگەکاندا دەڵێت ئەرکی مامۆستایانە هەر لە قۆناغی سەرەتاییەوە ئەو کێشەیە بە هەند بگرن و بەر بەو دیاردەیە بگرن، بۆ نموونە کاتێک منداڵان گێچەڵ بە یەکە دەکەن نەخرێتە چوارچێوەی یاریکردن و بە بیانووی منداڵی و یاری چاو لەو دیاردەیە نەپۆشرێت لەبەرئەوەی کێشەکان لەو قۆناغە سەرەتاییانەوە دەبێت بەری پێ بگیرێت.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".