Per Mikael Utsi ja Anders Kråik. Govva: Thomas Sarri

Digaštallan lávdegoddehámis

Digaštallan lávdegottit
1:41 min

Stivrra evttohus, geahččalit bargat lávdegoddehámis olggobealde Staare dievasčoahkkima, bovttii garra digaštallama. Máŋggas vuostálaste evttohusa  - ja stivrra várreságadoalli Anders Kråik jorggihii ja bivddii ášši sáddejuvvo ruovttoluotta stivrii fas ođđa gieđahallamii.

Stivraságadoalli Ingrid Inga imaštalai go Anders Kråik fáhkkestaga ollesčoahkkimis rievdadii oainnu. Kråik lei čállán vuollái stivrra evttohusa, muhto maŋŋel digaštallama son logai sátnestuolus ahte son lea válmmas sáddet ášši ruovttoluotta stivrii. Kråik meidne ahte ferte leat vejolaš guldalit sámedikki lahtuid ja rievdadit oainnu.

Stivra jurdda lei dan dievasčoahkkimis juo geahččalit bargat lávdegottiin, mat de válbmedivčče áššiid dievasčoahkkimii. Stivrra mielas lei hoahppu dal álgit dainna bargguin vai sáhttá várret ruđaid dan bargui boahtte jagi bušeahtas juo.

Eanas lahtut gal oidne lávdegottiid deaŧalažžan, vai buot lahtut besset oassálastit áššiid gieđahallamiin ja maiddái vai dievasčoahkkimis ii dárbbaš geavahit nu ollu áiggi digaštallamii juohke áidna áššis.

Muhto ollugat moite go lea ila johtilit mannan ja máŋggas lohke vel ahte sii eai lean ožžon makkárge dieđu dan birra ovdal čoahkkima. Stivraságadoalli Ingrid Inga mieđiha ahte soaitá ila johtilit mannan, muhto meidne ahte lea hoahppu oažžut johtui dan barggu.

Dievasčoahkkin mearridii loahpas várret diimmu dasa ahte lahtut besset iešguđet joavkkuin ságastallat daid lávdegottiid birra. Ja dan áigot dahkat viđaáigge gaskavahku.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".