1 av 2
RSR moaitá raporterema áššis gos muitaluvvo lobihis sarvabivddus. Govva: Alexander Linder
2 av 2
Anders Blom, RSR:a lihttodirektevra. Govva: Anna-Maria Ahlén

Moaitá mediaid raporterema

Sámiid Riikasearvi (RSR) moaitá mediaid raporterema Vapsten sarvabivdoáššis, ja erenoamážit SVT Västerbottensnytta. RSR:a lihttodirektevra Anders Blom lohká dan leat lahka vašolašvuođa álbmotjoavkku vuostá.

 – Ságastallan lea fargga dan dásis ahte sáhttá leat  álbmotjoavkku vašuheapmi, lohká Anders Blom.

Son lohká ahte mediaraporteremis leat sivahallan visot Vapstena miellahtuid ja dat lea dasa lassin dagahan ahte sámit sivahallojit álbmogin. SVT Västerbottensnytt lea máŋga beaivvi maŋŋálaga muitalan ášši birra gos moadde deardnalačča sivahallet Vapstene čearrolahtuid bivdit sarvvaid lobiheamet.

Anders Blom čuoččuha ahte mediat leat leamaš ovttageardánat  - ja go leat ná garra čuoččuhusat de ii leat doarvái dušše dadjat ahte nuppe bealli ii hálet kommenteret.

SVT Västerbottensnytta redaktevra Arne Muller čállá sin ruoktosiiddus ahte sii livčče bargan seammaláhkái beroškeahttá makkár bivdojoavku fal livččii navdojuvvon goddit ila ollu sarvvaid.

Västerbottens Kurirena áviissa journalista Bert-Olof Brännström lea Norrbottena ja Västerbottena almmuhanjoavkku jođiheaddji.

Son lohká váidalahtti go SVT Västerbottensnytt nu háreheamit lea geavahan "sámit" sáni go leat čilgen dán áššis gos muitalit muhtun boazoeaiggádiid birra geaid navdet lobihisbivddus.

Brännström dadjá vel dat ii soaitte leat riekta muitalit čearu nama dákkár ášši raporteremis. Ja son ipmirda ahte RSR moaitá mediaid, vaikko fal son ii leat jur ovttaoaivilis RSR:in.

 – Manná ila guhkas go gohčoda dan álbmotjoavkku vašuheapmin. 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".