Sápmi

Hálddašangielddaide unnán ruhta

1:35 min

Ráđđehus lasiha doarjaga sámi ja suoma hálddašangielddaide guvttiin miljuvnnain muhto dárbu livččii logi miljuvnna danin go leat ovcci gieldda geat hálidit šaddat hálddašangieldan.

Integrašuvdnaministar Erik Ullenhag ii sáhte dál vástidit movt ráđđehus galgá čoavdit ruhtadeami. Muhto Ullenhag lea duhtivaš go ráđđehus lea sáhttán lasihit doarjaga vaikko ráđđehusas lea heajos ruhtadilli.

Doarjja hálddašangielddaide juhkojuvvo gielddaid olmmošlogu mielde. Vuolimus doarjja lea 750 000 ruvnnu ja eanemus sáhttá oažžut birrasii golbma miljuvnna ruvnnu jahkái.

Oktiibuot ovcci ođđa gieldda leat ohcan šaddat hálddašangieldan várjalan ja nannendihte unnitlogugiela. Gávcci dain gielddain hálidit šaddat hálddašangieldan suomagillii ja okta sámegillii, Döörte gielda Västerbottenis.

SR Sisuradio rehkenastimiid mielde lea dárbu logi miljuvnna ruvnnu jus galggašii addit daidda ođđa gielddaide doarjaga muhto ráđđehus evttoha dušše guokte miljuvnna ruvnnu.

Ministar Erik Ullenhag ii sáhte dadjat movt ráđđehus áigu bargat viidáseappot. Okta vejolašvuohta lea váldit ruđaid maid dálá hálddašangielddat eai leat geavahan dán rádjái, lohká Erik Ullenhag.

Thomas Sarri

Thomas Sarri

Sameradion
070-269 61 62

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet: