Bárdni šattai čađahit sámi giellageahččaleami skuvllas

Go sápmelaš veahka Eskilstunas ozai eatnigieloahpahusa logi jahkásaš bárdnái bággii gielda bártni dahkat giellageahččaleami gullandihte jus sus ledje dat ovdamáhtut davvisámegielas maid skuvla gáibidii. 

Muhto geahččaleapmi leai ollásit mielaevttolaš danin go eai gávdno magelágán kriteriat dasa mat ovdamáhtut eatnigielas leat.

Bártni áhčči, Göran Fjellborg, dadjá dilli leai hirbmat unohaš ja dovdui badjelgeahččanvuohta skuvlla bealis:

-Min váhnemiid buolva šadde heahpanit sápmelašvuođain ja máŋggas cápmahalle go sámástedje. Dat lea dagahan ahte ollusat eai oahpahan iežaset mánáid sámegiela ja dal go mu bárdni šattai gillát dán giellageahččeami, dat munnje čuozai hui garrasit, dadjá Göran Fjellborg.

Guovvamánus ozai veahka eatnigieloahpahusa bárdnái muhto go gielda ii gávdnan heivvolaš oahpaheaddji, de šattai veaga bargu čoavdit ášši. Ovdal go bárdni de oaččui dan eatnigieloahpahusa masa sus lea riekti, bággii gielda su čađahit giellageahččaleami.

Go eai gávdno magelágán kriteriat dasa mat ovdamáhtut leat eatnigielas, de šattai jurddašuvvon eatnigieloahpaheaddji Ellen Simma Fjellgren, hui imaš dillái.

Leai ollásit mielaevttolaš mii galggai geahččaluvvot ja maŋŋel lea Ellen Simma Fjellgren máŋgii jurddašan masa son jur duođain mieđai.

Geahččaleamis leai maiddái skuvlla rektor mielde ja sihke Göran Fjellborg ja Ellen Simma Fjellgren muitaleaba ahte bárdni nu áŧestuvai ahte ollásit lássanii sus.

Göran Fjellborg oaidná olles dili joatkkan vealaheamis sámiid vuostá:

-Stáhta lea oktii suoladan giela mis ja dál gáibidit mánáin ahte jus galget beassat oahppat giela de fertejit máhttit giela, dadjá son ja lasiha ahte visot geat ledje mielde dovde geahččaleami unohassan.

Rektor Ann Eldin dadjá ahte son otne eahpida buori dán geahččaleamis ja son šálloša ahte šattai nu got šattai:

-Lea hirbmat váivi danin go ii leat mu meinnet bissehit geange iežas rivttiin ja jus lea dasalassin historjá mii dagaha ahte dovdá iežas vealahuvvon, de in hálet gal das leahkit oasalaš, dadjá son. 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".