Lars-Nila Lasko. Govva: Anne-Maret Blind / Sameradion
Same Ätnam

Same Ätnama ságadoalli váldá botta stivrendoaimmas

Same Ätnama ságadoalli Lars-Nila Lasko váldá botta iežas stivradoaimmas mearritmeahttun áigái. Nu lea liige stivračoahkkin mearridan.

Dát maŋŋel go Same Ätnam sivahuvvo verrošeamis. Sivvan dasa lea ahte Same Ätnam lea ožžon 70 000 ruvnnu Sámedikki kulturráđis dáiddačájáhussii mii ii leat goassege čađahuvvon. Čájáhus galggai čađahuvvot ovttasbarggus Árviesjávrrie sámeservviin muhto searvvis gal dadjet ahte dát lea čielga behtolašvuohta.

-Dát ii leat dohkálaš, danin mii gáibideaimmet ahte son váldá botta doaimmastis, dasa gal mieđai Lars-Nila Lasko dakkaviđe, dadjá Peter Rodhe, stivralahttu Same Ätnamis.

Peter Rodhe muitala ahte Lars-Nila Lasko lea čielggadan iežas doaimmaid stivrii ja stivra lea dohkkehan su čilgehusa. Lasko oaivvilda ahte son ii leat diđolaččat verrošan, son jáhkii ahte dáiddaprošeakta leai čađahuvvon ja válmmas. Ruđat galget dal máksojuvvot ruovttoluotta Sámedikki kulturráđđái.

Jus stivra ii ane ahte son lea boasttut bargan, manin lehpet gáibidan ahte son váldá botta iežas stivradoaimmas?

-Mu mielas son gal lea boasttut bargan ja dat dagahii ahte Árviesjávrrie sámesearvi šattai váivves dillái Sámedikki ektui. Muhto stivra ii oaidnan ahte son lea áigun verrošit ja ruđat hal eai leat láhppun ja danin mearrideaimmet ahte son dušše váldá boatkka doaimmas, dadjá Peter Rodhe.

Same Ätnama riikkačoahkkin lea guovtti vahku geažis. Dassážii galgaba stivralahtut Kristina Larsgren ja Peter Rodhe ovttas doaibmat ságadoallin.

Maid dat mearkkaša ahte Lars-Nila Lasko váldá botta mearritmeahttun áigái? Sáhttá go dat mearkkašit ahte son boahtá ruovttoluotta ságadoallin maŋŋel riikkačoahkkima?

-In dieđe maid válgaválbmenjoavku dahká. Su mandáhtaáigodat nohká boahtte jagi ja riikkačoahkkin ferte dal mearridit su joatkevaš stivragohččosa birra. Muhto son ii boađe ruovttoluotta stivraságadoallin ovdal riikkačoahkkima ja son ii galgga oassálastit riikkačoahkkimis ge, dadjá Peter Rodhe.

Nu ahte son sáhttá boahtit ruovttoluotta maŋŋel riikkačoahkkima?

-Juo, nu sáhttá šaddat.

Same Ätnam áigu dal Árviesjávrrie sámesearvvis ja Sámedikki kulturáđis átnut ándagassii.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".