Birgitta Simma, Ruoŧa girkus. Govvejeaddji: Håkan Sjunnesson, Luleå stift.
Muoffie

Nissonolbmot ja álgoálbmogat girkobeivviin

"Nissonolbmos lea stuorra árvu sápmelaččaiguin"
1:33 min

Bearjadaga álget sámi girkobeaivvit, main gieđahallot earret eará dálkkádatrievdadeamit ja álgoálbmogiid dilli. Birgitta Simma, Ruoŧa girkus, galgá sárdnidit girkobeivviiin ja son muitala ahte maiddái nissonolbmuid dili galget loktet dán vahkkoloahpa.

Eanet go duhát olbmo vurdojuvvot boahtit sámi girkobeivviide Muoffies (dárogillii Mo i Rana). Sámit ja iežá álgoálbmogiid ovddasteaddjit bohtet Norggas, Ruoŧas, Suomas, Ruoššas ja iežá riikkain vai ságastallat ja suohtastallat. Bearjadagas gitta bassái sii galget guldalit sárdnideddjiid, teáhtera geahččat, spáppa čiekčat ja semináriide oassálastit.

Girkobeivviin galget dán jagi gieđahallot nissonolbmuid dili, ovdamearkka dihte čájehuvvo teáhterčájálmas Elsa Laula birra. Ja dat atná Birgitta Simma buorrin.

– Sápmelaččat leat agibeaivvi atnán nissonolbmo árvun. Ja dat árvu lea vehá láhppon, son lohká ja sávvá ahte sii sáhttet dan fas loktet.

Maiddái dálkkádatrievdadeamit ja álgoálbmogiid dilli máilmmis leat gažáldagat mat galget gieđahallot. Girkobeaivvit álget bearjadaga – riikkaidgaskasaš álgoálbmotbeaivvi – ja Birgitta Simma lohká ahte váikko girku historjá eamiálbmogiid hárrái lea seavdnjat, dat lea maŋemus jagiid čuovgagoahtán.

– Jáhkkán buorebut ja buorebut šaddá. Ja nu lea máilmmis nai álgoálbmogiiguin, sii leat ožžon eanet saji ja leat beassan eanet vuoseha iežaset kultuvrraid.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".