Máilbmi

"Buot riikat máilmmis galget soabadit álgoálbmogiid dili"

Dán vahkku bođii nubbe árvalus loahpalaš cealkámuššii FN generalačoahkkimii mas fáddán lea álgoálbmogiid dilli. Loahppadokumeanta árvalus ávžžuha ovdamearkkadihte mielláhttostáhtaid guđet eai vel leat vuolláičállán ILO 169 dahkat dan.

- Buot riikat máilmmis galget soabadit dokumeantain, nu ahte obbalohkkái mun jáhkán dat šaddá oalle buorre, árvvoštallá Sámiráđi jođiheaddji Áile Jávo. 

- Mii bargat ain. Proseassa manná ain ovddasguvlui. Dál gulahallet stáhtat ieža gaskaneaset movt sii galget dahkat. Álgoálbmogat eai leat čohkkedan rohkalasgieđaid vuordit bohtosa. Mii šihtadallat, gulahallat ja ráđđadallat daiguin riikaiguin maiguin mis lea buorre gulahallan vai dat ovddidit min oainnu, muitala Áile Jávo. 

ON:a generálačálli nuppi árvalusas loahppačállosii leat oktiibuot 36 čuoggá. Ovdamearkkadihte árvaluvvo ahte stáhtat galget gudnejáhttit álgoálbmogiid oainnu mii guoská luondduhálddašeamis ja bistevaš ovdáneapmái. Sisdoallu das guoská máhttui mii čuovvu go guhká leat bivdan, čoaggán, guođohan, eanádoaluin bargan ja álgoálbmogiid máhtut, vuogit ja kultuvra. 

- Diehttelasat ii leat lihka čielggas go Áltta-čálus mii lei min álgoálbmogiid árvalus, muhto lea oalle buorre go smiehttá vuosttaš árvalusa, dadjá Jávo.

Árvaluvvo maiddai ahte stáhtat galget mieđihit gudnejáhttit ja geavahit álgoálbmogiid máhtuid ja birgenvugiid bisuhit iežaset birrasa, go riika- ja riikaidgaskasaš politihka, dássi ja dagut ovddiduvvojit go galget dálkkadatrievdademiid ja- heivehemiid hehttet. 

- Riikaidgaskasaš proseassat ádjjanit hui guhka. Sáhpanlávkkiiguin manná ovdadsguvlui, ja dan 18 jagi go mun lean leamaš Sámiráđis de lea hui olu ovdánan čilge Áile Jávo. 

Dan ovdaneamis leat riikaidgaskasaš ON ásahusat nu movt  ON:a bistevaš forum álgoálbmogiidda, ON.as lea maid erenoamaš goziheaddji álgoálbmotáššiin ja eamiálbmotdeklárašuvdna.

Son čilge riikaidgaskasaš politihkalaš proseassaid erenoamaš hiljánin. 

- Lean oahppan ahte muhtomiin oažžu ádjanit, daningo boađus šaddá dainnalágiin olu buoret, himiha Áile Jávo guhte lea 18 jagi leamaš Sámiráđis. Son liiko Sámiráđi bargovuohkái gos álo ohcalit soabalašvuođa eaige goassege jienas hoahpuhit mearrádusaid. 

Áile Jávo mielas lea stuora ášši go ON:a alimus dásis šaddá álgoálbmogiid dilli fáddán. ii goassege ovdal leat dat dáhahuvvan OB: a generálačoahkkimis. 

- Dat eat leat mii álgoálbmogat geat leat árvalan dan, dat lea ON ieš ja riikat mat leat vuolggahan dán (ahte generálačoahkkin galgá gieđahallat álgoálbmotáššiid), ja go gearddi lea nu ahte de leat mii álgoálbmogat dadjan ahte mii háliidit leat fárus hábmet dan mii das galgá leahkit boađusin. 

Árvalusa dán dokumenttii sáhttibehtet lohkat liŋkkas. Čálus gávdno eŋgelasgillii. 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet: