Västerbotten

Ođđa namas ohcet minerálaid

Blackstone Nickel reastaluvai, iige sáhttán máksit buhtadusa nu got lei dubmejuvvon dahkat, dál ohcá eará fitnodat ohcanlobi seammá guovllus.

Gungnir Resources lea ožžon guokte ohcanlobi Västerbottenis ja leat goalmmát ohcamuša sádden Bergsstaten eiseváldái. Sii leat ohcan seammá guovlui dan dihte go doppe lea ovdal leamaš geahččalanroggan.

Vihtta jagi áigi lei Blackstone Nickel Viddolvearieh álbmotmeahcis ohcame minerálaid, sin geahččalanroggan buvttii vahágiid Gran čerrui.

— Mii fertimet caggat ealuid, eat sáhttán johttát, dadjá Tobias Jonsson gii lea Gran čearu ságadoalli.

Blackstone Nickel dubmehalloi dalle máksit Gran čerrui buhtadusa, 807 000 ruvnnu muhto fitnodat reastaluvai ja čearru ii leat ožžon mávssu.

Goit juobe guokte guovddáš olbmo dan reastaluvvon Blackstone Nickel fitnodagas áigot dál ođđa fitnadaga namas ohcat minerálaid Viddolvearieh guovllus Västerbottenis.

Bergsstaten eiseváldi lea bidjan gažaldaga Gungnir Resources fitnodahkii ahte čilget makkár rolla fitnodaga olbmuin lei Blackstone Nickel fitnodagas.

— Blackstone gal ii oaččo šat lobi, dadjá Åsa Persson, báktemeasttir Bergsstaten eiseválddis.

Muhto son ii áiggu vel kommenteret Gungnira oktavuođa Blackstonai, ii ovdal go lea ožžon Gungniras vástádusa. 

Relaterat

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".