1 av 2
Váivi go ruhtabálvalus ii doaimma albmaládje, dadjá Elle Susanna Mannela
2 av 2
Váivi go ruhtabálvalus ii doaimma albmaládje, dadjá Elle Susanna Mannela
Ruoŧŧa / Sverige

Ii oačču olggus luovus ruđaid boaittobealguovlluin

Measta olles jahki lea gollan dan rájis go Giroservice nammasaš máksinbálvalus ruoŧa boaittobealguovlluin heaittihuvvui. Dal lea máksinoassi bálvalusas álggahuvvon fas muhto olbmot unna báikkážiin eai sáhte ain váldit olggus luovus ruđaid. 

Elle Susanna Mannela lea vuolgan Gárasavvona gávpái oastit biepmuid ja iežá dárbbašdiŋggaid. Son lea hárjánan geavahit luovus ruđaid máksinneavvun muhto daid ii leat beare oažžut gihtii nu got ovdal. Son ferte Gironii mannat jus galgá váldit olggus eanet luovus ruđaid.

- Doppe leat nu ruoŧelaččat, ii siiguin ge nu birge. Ferte dulkka váldit mielde, dadjá Elle Susanna Mannela.

Vihtta jagi áigi heattihii ruoŧa stáhta iežas máksinbálvalusa boaittobealguovlluin ja fitnodat Giroservice válddii badjel doaimma. Muhto logi mánu áigi bisttii fitnodat doaibmalobi ja bálvalus bissehuvvui. Dalle manai Ođđasat Viikusjávrris Wilhelm Sevä luhtte gii muitalii máksinváttisvuođaid birra.

Dal lea Giroservice ođđa hámis fas ceggeme bálvalusaid muhto luovus ruđaid ii sáhte ain váldit olggus ja dát dilli čuohcá gili olbmuide.

Ingvar Eliasson gii jođiha gávppi Gárasavvonis dadjá ahte vuoras olbmot geat eai leat hárjánan goartta geavahit gillájit eanemusat ja fitnodateaiggádat geat vuvdet ja ostet go lea 18 beanagullama lagamus báŋkui.

Leanastivra galgá bearráigeahččat ahte máksinbálvalusat boaittobealguovlluin lea dan dásis mii lea dárbbašlaš servodagas muhto ieš bálvalus lea kommersiála fámuid gieđaid siste. Bargu fas oažžut johtui bálválusa ovdána, dadjá gieđahalli Camilla Häggström leanastivrras.

- Muhton funkšuvnnat doibmet juo ja sávvamis olles bálvalus oalle fargga, dadjá Camilla Häggström.

- De dat gal lea buorre, de gal šaddá hui buorre. Čuvggoda máilbmi, loahpaha Elle Susanna Mannela.

 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".