Romssa Universitehta ii ane árvvus lavdnjegoađi

3:35 min

Romssa Universitehta olggobealde lea lavdnjegoahti, goahti lea oalát vesáluvvan, suoinnit ja rásit leat šaddan nu ollu iiba oainne ahte goahti dat lea das. Goahti guoddá ovddeš sámegiela professor Juhu Niillas dahje Nils Jernsletten nama ja lea sutnje gudnin.

Ánde Somby lea Romssa Universitehta láhka- dahje juridihka instituhta vuosttas amanuensa. Su mielas lea váivi ja heahpat go Romssa Universitehta ii ane árvvus lavdnjegoađi maid leat huksen Nils Jernslettena gudni máinnašupmin. Deatnolaš Juhu Niillas rohkki lei vuosttas sámegiela professor Romssa Universitehtas ja Ánde Somby dadjá ahte danne leage unohas oaidnit go eai fuolat goađi, dat ii leat čuohpastuvvon ja doppe ii leat bassojuvvon, ja dat lea hilgojuvvon dadjá Ánde Somby.

- Dát hilgun lea hui ilgat oaidnit, lavdnjegoahti galggai leat symbolan  man buorre dilálašvuohta sámiin ja sápmelašvuođas lea Romssa Universitehtas, ja mearkkaša go dasto ahte sápmelašvuohta ja sámit leat hilgojuvvon Universitehtas imašta Ánde Somby.

Somby muitala ahte son lea máŋgii váldán oktavuođa ovddasvástideaddji olbmuin Universitehtas ja maiddái Universitehta njunnošiin, ahte dat galggašit fuolahit goađi. Muhto ii leat mihkkege dáhppáhuvvan.

Iibat leat dárbu dása?

- Dasa han gal livčče hirbmat dárbu, doppe lea máilmme fiinnis, mun han láven bealistan muhtumin geavahit dan iežan oahpahusas

Somby muitala ahte go son čilge álgoálbmot rievtti iežas studeanttaide goađis, de dat áddejit dan buorebut go dábálaš logaldallanlanjas.

Nugo dál lea, de ii leat vejolaš geavahit Lavdnjegoađi, láhttefiellut leat luvvosat ja dat lea badjel beannot mánu nie orrun, ja Somby lohká ahte doppe ii dáhppáhuva mihkkege ja orru čielggas ahte eai áiggo dahkat maidege dainna.

Mii du mielas galgá dahkkot dán áššis?

- Mu mielas gal Universitehta njunnošat fertejit dien álgit fuolatit, nu ahte dat ii gahča dasa midjiide buohkaide heahpadin. Mis han ii leat somá geain bargat sámi ja álgoálbmot áššiin, ahte go midjiide bohtet guossit mis lea goahti nie hilgojuvvon ja nie loatkanan, lohká Ánde Somby.  

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade ljud i menyn under Min lista