Giron/ Kiruna

Guđa jagis ii leat ožžon bisánanlobi

Ruoŧŧa lea dat davviriika gosa ollu báhtareaddjit ja dorvoohccit bohtet, vaikke guđa jagis ii leat ožžon lobi bisánit, de lea lihkká giitevaš go lea dáppe.

Son lea okta dain olbmuin geat leat ohccán dorvvu Ruoŧas, 6 jagi lea son vuordán beassat álggahit eallima dáppe nieiddainis. Muhto áidna maid Dorvoohcciiddoaimmahat sáhttá fállat sudnuide lea seaŋgasadji 15 amas olbmuiguin.

Son ássá nieiddanis dáppe Gironis ovtta dálus 15 eará dorvoohcciiguin. Guhtta jagi áigi bođii son Ruŧŧii dorvoohccin Etiopias Afrihkás, dál lea guhtta jagi leamaš Ruoŧas.

- Mon háledan oahppat ruoŧagiela go dan haga ii oačču barggu, dadjá Emebet Fekadu ja lea goit giitevaš go lea eallime.  

Ruŧŧii bohte dušše mannan vahkku badjel 3 200 báhtareaddji ja dorvoohcci, stuorámus oassi Syrias, muhto maid eará riikkain gos lea soahti dahje soahtelágáš dilli. Badjel 700 dain ledje mánát geat bohte akto. Ruoŧŧa lea davviriikkaid gaskkas dat mii váldá eanemus báhtareaddjit, dan jagi doivot 80 000 olbmo ohccat dorvvu Ruoŧas. 

Emebet Fekadu lea máŋgasa sis deaivan geat Gironii bohtet.

- Mon lea dat vuosttaš gii fárrii deike, dan vissui gos orrot 16 olbmo, mu maŋŋel leat sulli 300 olbmo boahtán ja mannan. Mus ii leat eará vejolašvuohta go ii leat gosa vuolgá, dadjá Emebet Fekado.

Lea Dorvoohcciiddoaimmahat geas lea ovddasvástádus veahkehit sin geat dárbbašit veahki orrunsaji gávdnat. Gironis, Jielleváris ja Bájelis lea oktasaš doaimmahat ja sis lea váttis gávdnat nohkka buriid ja doarvái orrunsajiid dorvoohcciide. Dal juste leat sullii 1 500 saji mat eai leat goassege guorus, olbmot bohtet ja mannet. Muhtomat geat ožžot bisánanlobi šaddet gieldda ovddasvástádus ja muhtomat máhccet ruoktut dehe mannet goalmmát riikii.

Emebet Fekadu čájeha birra viesu, son dat lea nieiddainis orron dáppe guhkimus áiggi. Dál orrot golmma riikka nissona dáppe, son muitala ahte eatnašat eai oro earágo moadde mánu áin hávil ovdal fas sirdet.

- Lea imaš eallin, loahpaha Emebet Fekadu.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".