SÁPMI

Bispá háliida eanet sámegiela girkus

Sámegiella lea jávkosis girkomeanuin ruoŧabealde ja bispá Juleva bismagottis mieđiha ahte sámi girkomeanut leat jávkan maŋemus áiggi, muhto ahte searvegoddái lea hui dehálaš ahte visot dovdet gullevašvuođa girkui. 

Heikko Lásse Josep ohcá leat go sámi girkomeanut Jiellevári searvegottis dieđihuvvon aviissas, muhto ii gávnna.
- Gal dat livččii somá gullat go juo orru dáppe Sámis ahte livččii joskus ge muhto dat ii leat, ii soaitimis ge, dadjá Josef Blind

Nu got mii ovdal leat muitalan, de sámit ruoŧabeal davvi guovllus moitet ahte sámevuohta girkus lea unnon maŋemus jagiid. Girkoortnega mielde galget girkomeanut ja diakoni maiddái dollojuvvut iežá gielain go ruoŧagielas ja gullot dábáláš searvegoddedoibmii. Searvegottit galget iežaset instrukšuvnnas čielggadit got dahket dán máŋggagielalaš barggu. Jielleváris lea čállon ahte galget leahkit sámi oasit ovdamearkka dihte hávdádusain ja gásttahemiin jus nu gáibiduvvo, earret dan ahte oktii jagis doallat girkomeanuid sámegillii. Dat lea ilá unnán, mieđiha girkohearrá Mats Rondahl.

- Sivvan dasá lea go giellagelbbolašvuohta váilo, sis ii leat oktage bargi gii hálddaša sámegiela, dadjá Rondahl

Bispá Hans Stiglund Juleva bismagottis oaidná maiddái dáid váttisvuođaid muhto su mielas báhpat ja iežá girkobargit dán áiggi leat eanet áhpasat oahppat sámegiela, juobe dan ge veardde ahte doallat oanehis sártniid ja buressivdnádusaid ja sus leat doaivagat boahtte áigái go guoská sámegielváilevašvuhtii girkus.

- Dal juste leat moattis geat lohket teologiija geat eai leat sámit muhto háledit oahppat sámegiela. Bismagotti bealis sii geahččalit doarjut sin sihke ruđalaččat ja iežáládje go dat sáhttá leahkit vuođđu ovddosguvlui, dadjá Hans Stiglund.

Muhto Josef, gii váillaha sámegiela girkus, meidne ahte sámegiella ii leat goassege beassan saji váldit girkus.

Dat lea juo dološ áiggi juo leamaš danin go sápmi lea leamaš veahá heajut olmmoš go earát. Dat gal lea dološ vihkki diet, loahpaha viššalis girkomanni Josef Blind Jielleváris.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade ljud i menyn under Min lista