Ađevuopmi/Idivuoma

Ii oktage váldde ovddasvástádusa skuvlageainnus

Jovnna Simma lea gieža jahkásaš ja lea álgán vuosttaš skuvlajagi, muhto skuvlageaidnu lea váigat go sildi rastá jávrri ii lea sihkar. Aslat Simma orro veagainis Ađevuomis, Davvi Ruoŧas, gosa Ruoŧa gonagasa vehkiin bođii sildi, muhto dal ii aktage hálet eaiggádit dan.  

Skuvlamánná Jovnna boahtá ruoktut diehke Ađevuopmái bussegivttain. Vuosttaš geardde vázzá son silddi mielde rastá čázi. Su áhčči Aslat Simma lea iežas fámuin divvume silddi mii leai measta gahččan. Sildi man ii oktage hálet hálddašit.

- Eiseválddit leat vástidan ahte ii leat sin ovddasvástádus, dat lea din ovddasvástádus, dahket din. Nu mon lean ipmirdan, dadjá Aslat Simma.

Silddis lea earenomáš historjá. Leai Giron Sámi teáhtera hoavda Åsa Simma gii mánnán čálii ruvdnaprinsii ja siđai veahki oažžut silddi vai son ja su vieljat beasasivčče rastá skuvlii ja stoahkanrátnaid lusa ja beallejagi maŋŋel leai sildi sajis. Dal orro Aslat veagainis dán njárggas ja Jovnna lea álgán vuosttaš luohkkái sámeskuvllas. Muhto sámeskuvlastivrras ii leat ovddasvástádus sihkarastit geainnu skuvlamánáide, dat lea váhnemiid ovddasvástádus dadjá sadjásaš sámeskuvlahoavda Annechatrin Brandén.

- Min ovddasvástádus lea oahpahit mánáid ja ordnet skuvlagivtta mánáide geat dárbbahit dan. Raŧit ja diekkara eai gullo midjiide, dadjá Brandén.

Girona gielddaráđđi Kristina Zakrisson dadjá ahte gielda lea geahččalan čielggadit oamastandili muhto áidna maid leat gávnnahan lea ahte gielddas ii leat máŋgelágán ovddasvástádus sildái.Đ

- Gielda ii sáhte maidege dahkat go ii oamas dan. Leanastivra dat livččii lunddolaš hálddašeaddji go gonagas lea addán dan priváhtaolbmui, dat dagaha dan veahá váigadin, meidne Zakrisson. 

Sildi lea divvojuvvon 2003 rádjái go nu guhká gávdnui stáhtalaš ruhta dakkárlágán bargui. Dal leai sildi viŋadan ja measta gahččan ja Aslat ii oainne iežá ráđi go ieš divvut silddi.

- Mon lean goit geahččalan dahkat iežan beali njuolga ja gal eiseválddit nai galggalivčče váldit ovddasvástádusa min bealis, mii goit bargat ja máksit vearuid, dadjá váhnen Aslat Simma.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade ljud i menyn under Min lista