Elle-Marja Eira. Foto: Per-Josef Idivuoma/Sveriges Radio
Elle-Marja Eira. Foto: Per-Josef Idivuoma/Sveriges Radio
Veckans gäst - Radio Sápmi

Elle-Marja Eira: Lean cuvken máŋga mikrufuvnna

Lávlu ja filbmadahkki Elle-Marja Eira čálii vuosttaš lávlaga juo 9 jahkásažžan, ja daid gerddiid go Elle-Marja ja su keyboarda eaba soabadan šattai mikrufuvdna gierdat.
- Go in orron máhttime, de suhtten mikrufuvdnii ja cuvkejin dan, lohká Elle-Marja.

Elle Marja Eira, lea bajášsaddan Mázes ja gullo Láhkonjárgga orohahkkii. Son lea musihkkár ja filbmadahkki, ja maŋemuš áiggi lea su namma beaggigoahtán sihke sámis ja dáin davviriikkain. Vaikko leage beaggigoahtán ollesolmmožin, de lávii Elle-Marja lávlut 3-4 jahkásažžan juo.
- Eadni lei munnje oastán rukses káseahttačuojanasa mas lei mikrufuvdna, dainna mon lávejin huradit ja dánset speadjala ovddas, lohká Elle-Marja.

8 jahkásažžan oaččui keyboarda, dalle son čálligoađii iežas lávlagiid ja vuosttaš lávlla lei su hearggi birra.
- Moai oambeliin čuojaheimme lávlaga báddái, ja jáhkiime ahte šadde nástit, lohká Elle-Marja.
Elle-Marja muitá ahte lea lávlon mánnávuođa rájis, ja lohká lávluma ja juoigama leat oassin su eallimis.
- Mus lea hui juigalas bearas, ja lean álot háliidan muitalit muitalusaid, lohká Elle-Marja.

Vuosttaš konseartta Guovdageainnus lei 2006, dalle lei garra punkmusihkka ja son lávii vuollaga máiddái juhka lávdde nalde.
- Muittán ahte eadni heahpanii go juhken lávdde nalde, ja son logai ahte ii ábut juhkat jos galga professionella leahkit, muitala Elle-Marja.
- Ja mon čuovvulin su rávvagiid.

Elle-Marja Eira searvá Radio Sámi prográmmii odne P2 kánálas 15:00-16:00.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade ljud i menyn under Min lista