22 jahkásaš olmmái gii navdui terrordagu pláneme lea friddja

Olmmái gii mannan vahku váldojuvvui gitta boliissas unna báikkážis davvi Ruoŧas lea luitojuvvon friddja ja eat leat šat navdojumit su vuostá muhto terroráitta Ruoŧas bissu ain alla dásis.

22 jahkásaš olmmái gii duorastaga váldui gitta Bolidenis, Västerbottenis, go boliisa navddii su terrordaguid pláneme Ruoŧas, lea luitojuvvon friddja. Dan mearridii Hans Ihrman gii lea várre alimus alaguoddi Stockhoalmma diggerievttis.

- Navdojumit su vuostá mat ledje álggus leat rievdaduvvon guorahallanáiggis ja dan sivas son mearridii luoitit olbmá. Vaikko dát olmmái ii leat šat navdojuvvon gávdno ain ágga guorahallat viidáset, dadjá Hans Ihrman.

Mannan gaskavahku loktii ruoŧa sihkarvuođaboliisa (SÄPO) terroráitaga njealji rádjái viđa čuoggásaš dásis, mii lea alimus goassege Ruoŧas. Sihkarvuođaboliissa veardideapmi vuolgá sierralágán dieđuin ja dat veardida visot dáhpáhusaid máilmmis mat sáhttet rievdadit vejolašvuođa čađahit terrordaguid Ruoŧas. Veardideapmi dahkkojuvvo bistevaččat ja sáhttá rievdaduvvot dađistaga dieđiha SÄPO iežas ruovttusiiddus.

- Mii galgat jearuhit muhton olbmuid oažžundihte eanet dieđuid plánejuvvon terrordagu birra. Mihttomearri min barggus lea ollásit dusttet terrorplánema Ruoŧa vuostá, dadjá Mark Vadasz, diehtojuohkinhoavda SÄPO:s.

Ruoŧa sihkarvuođaboliisa joatká dasto guorahallat eahpečielgatvuođaid plánejuvvon terrordagus ja doallá lahka oktavuođa iežá sihkarvuođabálvalusaiguin Eurohpas Pariissa attentáhta ja Bryssela plánejuvvon attentáhta sivas.

 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".