Oahpahus sámiid birra ferte leat bákkolaš

Máhttu sámiid ja sámekultuvrra birra ruoŧa skuvllas ferte buoriduvvot eastadandihte ovdagáttuid ja dat ferte dáhpáhuvvat dal, dadjá  Sáminuora ságadoalli. Oahpahusministtar oaidná váttisvuođaid ja čujuha diehtojuohkinbargui maid ráđđehus lea álggahan rasismma birra.

Ollu mielláhtut Sáminuora organisašuvnnas leat nuorat geat ain vázzet skuvlla, danin lea ge Sáminuorra jagiid mielde geahččalan váikkuhit oahpahusa ruoŧa skuvllain eastadandihte ovdagáttuid oahppiid gaskkas.

- Máhttu sámi historjjá birra oahpahusas lea vuođđoeaktu vai ruoŧelaččat ja olbmot Ruoŧas dihtet manne lea nu got lea. Go geahččá ovdamearkka dihte Girjjesduomu, dat buktá jearaldagaid maid ii sáhte vástidit jus ii leat ožžon oahpu sámehistorjjás skuvllas, dadjá Sáminuora ságadoalli Isak Utsi.

Johkamohki márkana oktavuođas čoahkkánit ollu olbmot, nu maiddái ministarat nugo oahpahusministtar Gustav Fridolin gii guossástalai sámeskuvlla ja beasai oaidnit Girona ja Johkamohki sámeskuvlaoahppiid dánset. Son gávnnadii maiddái Sáminuora ságadoalliin ja čuovvula Isak Utsi gáibádusa loktet oidnosii historjjá.

- Ráđđehus lea bidjan johtui diehtojuohkinbarggu rasismma birra Ruoŧas ja lea diehttelas ahte dehálaš oassi lea sámehistorjjá ja dat mii dáhpáhuvai Ruoŧa stáđa ja sámiid gaskkas, čilge Gustav Fridolin.

Maŋŋel ságastallama oahpahusministariin bidjá Isak Utsi stuora luohttámuša ministarii go meidne ahte dát lea vuosttaš ráđđehus mas leat ulbmilat buoridit oahpahusa sámiid birra ja sámiide.

- Mon doaivvun ahte oahpahusministtar váldá mielde jearaldaga ahte sámegiella šaddá ánssolaš olggobealdde skuvlla ja ahte nuorra sámit stuora nođiin fertejit bealuštit sámi kultuvrra ja mon sáván ahte ministtar dahká juoidaid dasá dán áigodagas. Dal ii šat sáhte vuordit, loahpaha Isak Utsi, Sáminuora ságadoalli. 



Relaterat

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".