1 av 3
Sáminuorras ordförande Isak Utsi. Foto: Stefan Karlsson/ Sameradion & SVT Sápmi
2 av 3
Sáminuorras ordförande Isak Utsi. Foto: Stefan Karlsson/ Sameradion & SVT Sápmi
Alice Bah Kuhnke. Foto: Sameradion & SVT Sápmi
3 av 3
Alice Bah Kuhnke. Foto: Sameradion & SVT Sápmi

Sáminuorra ballá rasisma sámiid vuostá lassána maŋŋel Girjjesduomu

Sáminuorra ballá rasisma sámiid vuostá lassána maŋŋel go Girjása čearru diggerievttis vuittii ruoŧa stáhta vuostá mannan vahku. Ruoŧa kultur- ja sámeministtar Alice Bah Kuhnke lohpida doaimmaid, muhto ii hálit čilget makkár doaimmat leat. 

Sámi álbmot beaivvis leai illu ja mokta, muhto rasisma lassána sámiid vuostá, erenomážit sosiála mediain, oaivvilda Sáminuora presideanta Isak Utsi, guhte dal bidjá garra gáibádusa ruoŧa ministariidda. Sii fertejit duodái váldit rasismaášši sámiid vuostá. 

- Stuorimus ášši mu mielas lea rasisma sámiid vuostá mii dal leavvá Girjjesduomu ja Gálloka dáhpáhusaid maŋŋel. Sámemánát fertejit bealuštit sin kultuvrra ja rivttiid skuvllas ja doppe ii leat máhttu duostut dan sága, dadjá Isak Utsi.

Oahpahusministtar Gustav Fridolin lohpida ahte sii galget geahččat got oažžut eanet sámi historjjá oahpahussii.  

Kulturministtar Alice Bah Kuhnke ii hálit dáđi eanet kommenteret go Girjása čearru vuittii ruoŧa stáhta vuostá eanet go ahte luohtida duopmustuolu bargui.  Muhto rasisma sámiid vuostá gal ferte caggat ja dadjá ahte lea bargagoahtan doaibmaplánain.  

- Go dilli servodagas rievda, sihke báikkálaččat ja olles riikkas, de ferte čuovvut dan dárkilit vai eai šattá riiddut. Mii leat juste dal ovddideame vugiid eastindihte rasisma sámiid vuostá, daid mii buktit ovdán maŋibu jagis muhto sierralágán doaibmabijut olles servodagas leat dárbbašlaččat, dadjá Alice Bah Kuhnke.

Girjása čearu eatnamat leat Jiellevári gielddas ja gielddas lea nai jurdda rasismaáššiin bargat dadjá gielddaráđđi Jeanette Wäppling. 

- Mis lea leamaš sáhka ovdal juo bohccobiinnidemiid geažil ahte ferte bargat miellaguottuiguin ja ipmárdusain nubbi nubbái. Bijan doaivaga ovttasráđđádallamii, dadjá Jeanette Wäppling. 

 - Eiseválddit fertejit duohtan váldit rasisma. Dan ii sáhte beare sihkastit eret ja dadjat dan leaikan.  Rasisma lea rasisma, uhkádus lea uhkádus ja vášši lea vášši. Dát lea dohkketmeahttun, dadjá sámeministtar Alice Bah Kuhnke.



Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".