Rievssatbivdu váidojuvvon

Ruoŧa bivdonjuolggadusat mat gusket smávvafuođđobivdui duoddariin leat váidojuvvon go olgoriikkalaš bivdit oaivvildit ahte dat rihkku EO-vuoigatvuođaid

Dán čavčča eai leat olgoriikkalaš smávvafuođđobivdit beassan álgit bivdit ovdal go dán vahku, golbma vahku maŋibu go ovddiid jagiid.
Dát ođđa smávvafuođđobivdonjuolggadusat dal váidojuvvon Kommerskollegiumii, eiseváldi mas lea ovddasvástádus olgoriikagávppašeapmái.

- Dát rihkku EO-vuoigatvuhtii mii guoská fridja gávppašeapmái gaskal riikkaid. Dat bisseha EO-ássiid boahtit Ruŧŧii bivdit ja váldit oasi bálvalusain. Dat vealaha bivdiid olggobealde Ruoŧa, dadjá Ulrika Bååth Bertram, Kommerskollegiumas.

Cuoŋománus dán jagi mearridii Ruoŧa ráđđehus rievdadit 3:at paragrafa boazodoallonjuolggadusas nu ahte smávvafuođđobivdu galgá leahkit vuosttažettin ruoŧelas bivdiide ja mearridii maid maŋidit áigemeari olgoriikkalaš bivdiide čakčamánu 15 beaivái.

Dal lea Kommerskollegium bidjan johtui guorahallama iskkandihte jus Ruoŧŧa rihkku EO-vuoigatvuođaid.

Jan Rannerud, stivralahttu Sámedikkis, atná dát lea buorre.
- Ruoŧŧa han lea mielde EO:as. Dal ferte vuordit ja gullat maid EO mearrida. Mon in leat nu sihkkar ahte EO gávnnaha ahte Ruoŧŧa lea dahkan boasttut. Ruoŧŧa ii leat bissehan olgoriikkalaš bivdiid EO:as bivdit, eai leat go áiggi maŋidan, dadjá Jan Rannerud.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade avsnitt i menyn under "Min lista".