Dan Eriksson, Suicide zero-organisašuvnnas.
Dan Eriksson, Suicide zero-organisašuvnnas. Foto: Marica Blind / Sameradion & SVT Sápmi
#EallinSápmi #LivetSapmi

Psyhkalaš dearvvasvuohta ja iešsoardin guovddážis boahtte vahkku

1:33 min

Mánnodaga álgá Sámeradios ja SVT Sámis fáddávahkku psyhkalaš dearvvašvuođa ja iešsorbmema birra Sámis. Ja mii ovdanbuktit das veháš iežálágan gova dan áššis.

Govva sihke Ruoŧas ja Sámis lea ahte leat eanet sámit geat váldet iežaset heakka go iežát. Vaikke dát govva lea oppalaš de lea leavvan juo guhkes áiggi. Sámeradio & SVT Sápmi galgá dal loktet digaštallama iešgoddima birra máŋga áššiin ja čájehit ahte gávdnojit sierra variašuvnnat ja boasttuvuođat raporteremis ja iešgovain.

Iešgoddin lea surgadis dáhpáhus ja váttisvuohta miehtá máilmmi. Logut čájehit ahte 800 000 olbmo váldet heakkaset juohke jagi. Davviriikkain lea dát váttisvuohta stuorimus Suomas, gos leat veahá eambbo iešgoddimat (juohke 1 000 olbmuin) go Ruoŧas.

Lea veadjemeahttun gávdnat rivttes loguid Ruoŧas. Sivvan dasa lea ahte ii álo sáhte duođaštuvvot jus lea sáhka iešgoddimis dehe lihkohisvuođas. Muhto Sosiálastivra Ruoŧas rehkenastá ahte leat sullii 1 200 iešgoddimat jahkásaččat, 3-4 juohke beaivvi.

Buot iešgoddimat leat surgadat ja váikkuhit lagasolbmuid garrasit.

Moadde vahku ovddos galgá Sámeradio & SVT Sápmi guorahallat man stuorat iešgoddinváttisvuohta sámiid gaskkas duođas lea.

Gávdnojit čuoččuhusat ahte sámit váldet heakkaset dávjjibut go iežát. Dát lea maid govva maid nai media lokte go raporterejit dieđalaš teavsttaid ja go ságastit olbmuiguin geat barget sámiid psyhkalaš dearvvasvuođain.

Iešgoddimat sámiid gaskkas govahallojuvvot nugo árktalaš- dehe álgoálbmotváttisvuohtan.

Áššiin ja prográmmain boahtá Sámeradio & SVT Sápmi ságastit olbmuiguin geat leat jurddašan dehe geahččalan váldit heakkaset, jearrat manin sis leat leamaš dakkár jurdagat ja mii dat leai mii dagai ahte eai čađahan iešgoddima.

Muhto mii galgat maid deaivat dutkiid ja olbmuid geain lea váldi iskkan dihte duohtavuođa čuoččuhusain main lea sihke heajos vuođđu ja leat oppalaččat ja gos dadjo ahte sámit váldet heakkaset dávjjibut go iežá ruoŧŧelaččat. Lea go dát duohta ja jus nu lea – mainna ládje lea dát  duohta ja makkár eavttut leat vuođđun dása?

Mii boahtit maid iskkat got iešgoddinváttisvuohta sámiid gaskkas gieđahallo dearvvašvuođabálvalusas ja eisseválddiin. Ja maid got iešgoddin sámiid gaskkas čuohcá sihke lagamuččaide ja servvodahkii.

Prográmmaráidu álgá ođđajagemánu 14 b. muhto juo dal, dehe dalle go leat álgán almmuhit prográmmaid sáhtát váldit oktavuođa minguin ja muitalit makkár jurdagat dus leat dehe buktit jearaldagaid min doaimmaheddjiide Jörgen Heikkii ja Anne-Maret Päiviö.

Jus don háliidat juohkit du jurdagiid, čállosiid dahje ságastit earáiguin dan birra sosiála medias - geavat de fáddágilkora  #eallinsapmi. 

 

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Du hittar dina sparade ljud i menyn under Min lista