Rádjeguovlu rievdan Coronaáiggis

Suoma ráji gidden buktá váikkuhusaid gilis ja guovllus gos olbmot eai jurddaš ge ahte riikkarájit gávdnojit, sihke olbmuide geat barget ja ellet guovttebealde ráji ja gávpeolbmáide geain leat gávppaheaddjit golmma riikkas.

Video: I gränsbygden Karesuando påverkas vardagen för de som jobbar och lever på båda sidor om riksgränsen och butiksägarna som har kunder från de tre nordliga länderna.
Se det textade inslaget i kvällens Ođđasat, SVT2, kl 17.30 och på SVT Play.

Marjut Eliasson orru suomabealde, bargá ruoŧabealde ja ferte ráji rastet máŋgii beaivái. Su mielas rádjedárkkisteapmi lea veahá unohas.

- Sii leat hárjánan ahte rádji álo lea rabas ja mon in leat ovdal dovdan ahte lea riikkarádji, dan gal dahká dal. Ii beasa nuppi riikkii nu got dábálaččat. Orru hui imáš, dadjá Marjut Eliasson.

Rádjedárkkisteapmi Suoma Gárasavvona stašuvnnas ii leat leamaš doaimmas guhkes áigái muhto dal vuhtto gilis ahte dárkkisteapmi lea jođus. Go SVT Ođđasat filbmateama ollii suomarádjái, de rádjevákta čuorvvui ahte ii oačču govvet ovdal go son suovvá nu dahkat. Unnan olbmot lihkket, eaige oidno suoma ja norgga biillat ruoŧabealde vuojašeame. Ja rádjegávppašeapmi gillá, nu duođašta gávpeolmmái ruoŧabeal Gárasavvonis.

- Lea ráfálaš. 90 proseanta gávppaheaddjiin leat lásaid duohken iežaset riikkas. Mon lean máhcahan visot diŋgojumiid, go ii dieđe mii dáhpáhuvvá. Soaitá ahte rádji leat gitta vaikko čavčča rádjái. Maid mon de dagan visot geassediŋggaiguin, dadjá Mats Eliasson.

Laila Idivuoma jođiha diŋgagávppi jur rádjeeatnogáttis. Dal lea jaska su nai gávppis go eai šattá sámi doalut dán giđa. Vaikko ii jur bala virusis de oaidná dan veahá balddehahttin.

- Ja, gal dat lea surgat go olles máilbmi bisánii dan virusa dihte. Dat lea oalle surgat, juoga dat lea goit duogáš, eat mii olbmot dasá dieđe maidege. Dat lea juoga badjelis mii min stivre, dadjá Laila Idivuoma.

Boazoeaiggát Nils Anders Blind, Geagganvuomi čearus, lea vuolgime suomaráji rastá ja davás ealu lusa. Su mielas ii leat rádjegidden vel váikkuhan su ja lea buorre go rájit leat gitta Corona virusa sivas.

- Ii leat mihkkege nu heaitu ahte ii leat juoga buorre. Mis lea dal boazodilli oalle heittot ja ollu muohta ja dal go leat gidden rájiid, dal eai leat skuhtervuoddjit. Bohccot ožžot goit ráfis leahkit, dan dáfus gal lea jalla buorre, dadjá Nils Anders Blind mojonjálmmiin.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet: