Täälä mie asun aivan meren ja kivitten seurassa. Foto: Elina Isaksson Kruukka.
Gränslösa bloggen

Elämän ihanat yllätykset

Hallo taas! Mie vielä täälä Robeissä elän. Oikeen sopeva elämä häyn sanoa, paitsi ette tääälä ei ole niin paljon tekemistä. Hyvä se hän sitten on ette olen töissä joka päivä. Ja ei se mikkhään huono työ ole, marsin aina ilosena töihin ja niin mie tulen kotia ki. Ja eilen hoksasin kunka fantastinen on ette mie täälä olen.

Ko met ajoima Melbourneistä Adelaidehiin niin met menimä läpi Robein (siis tämä paikka missä nyt asun) ja kävimä vissin jossaki kaupassa täälä, mutta mulla ei ollu silloin aavistusta ette mie tänne tulen takasin, ja vielä ette kuukauen olen täälä töissä. 

Aika mahtava kunka reisuplaani saattaa muuttua ko sitä ei päätä liian paljon. Puhun sen kans cheefin kans eilen, ette se on kyllä kauhean iso ero jos tänne Australihaan tullee plaanin kans (siis jos tietä mihinkä mennee ja koska sitä on sielä ja täälä ja niin pois päin) eli jos vain tullee ja sitten näkkee mitä tapahtuu.

Se saatta niin pilata jos esimerkiks on jo hosteli puukattu jossaki kaupunkissa ja sitten sitä piiain kohtaa hauskoja ihmisiä minkä kans haluaa reisata johonki muhun paikkhaan. Uskon ette otan tämän myötä kotia ki, ette en saa liian paljon planeerata ko elämä ei silloin saata yllättää minua yhtä paljon. Mutta sitten se hän on vähän erinlaista olla täälä verrattu kotona ruottissa...

Ahai!

/ Elina

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".