Mie uskon ette se oon hyvä kokea kulttuurikrokkia

Reisaaminen oon paras koulutus jälkhiin yniversiteetin, joku sano kerran. Vain onkos se tekosyy rahanhaaskaamisheen sen siihaan ko ette olla kotona, tehjä töitä  ja maksaa veroja?

Ko mie aloin opiskelheen korkeakoulussa niin mulla oli kuva valmis. Tämä lukuelämä pitäs mennä kätevästi ja sitten hopusti töihiin ja tienasthiin. Reisaaminen ei ollu silloin kartala. Korkeakoulun aikana tapahtu niin, ette mie tulin othaan ossaa LTU:n perintheestä, missä yks puuoppilas lähtee puoleks vueksi vaihto-oppilhaaksi Virginia Tekille, Ameriikhaan missä kansa oon puuosasto. Aivan niinku muissaki paikoissa maailmaa, tämä määrä oli aika pieni. Se oon oikeastamyön kummaa, ette innostus puutekniikhaan oon niin pikkunen. Aivan tässä meän pitkäomasessa maassa oon 87 miljaartia puuta pystössä ja sitä paitti met olema rakentanheet vähän mitäki niistä, siittä saakka ko met saima käet ja sormet.

Mie sain kuitenki huonekaveriksi Danielin, Ecuadorista lähtösin, ja tuttavuuspiihriin kuulu siis latinolaisia mutta kansa Ameriikalaisia ja ihmisiä muualta mailmaa. Samana syksynä, keskelä euforiita ette kohata muita ihmisiä, mie totesin  surulisesti-  mie en tule koskhaan kerkiähmään käyvä  kaikissa mailman maissa.  Mulla ei ole koskhaan- ei silloin eikä nyt, ollu  semmonen taviote, mutta se oli kuitenki uusi ajatus mulle.

Jälkhiin seittemän vuotta, jostako kaks niistä oon myöhästynny koulunkäynti  ja  paljon köyhempännä, mie huomaan ette matkustamisella yksin elikkä porukassa oon plyssat ja miinykset. Yksin sie kohtaat paljon enämpi ihmisiä koska sie olet enämpi ekstrovertti  ja semmosessa reisussa ei mene muihiin kyllästyä ko sinhuun itheen. Porukassa taas oon enämpi suunittelua ja aivan eri turvalisuus. Se oon kansa aika hauska olla yhessä muitten kansa jokka saattavat jakkaa kokemuksia sillä niistä ihmisistä mitä sitä kohtaa reisuila, tullee usseimiten vain tilapäisiä tuttuja.

Tentti reisaamisessa saata olla ette paskantaa houshuin Kiinassa, tulla huijatuksi Kambodjassa elikkä haastaa adrenaliiniä Uuessa Zeelandissa. Vain onkos se ette saaja uusia referensiä siiheen mailhmaan missä met elämä ja olema kotona?  Mie uskon ette se oon hyvä kokea kulttuurikrokkia ja hullunkurisia vasthoinkäyntiä  niin ette  muhavuus-svääri vennyy. Silloin oon enämpi tillaa tehjä suuremat tansipyöriskelyt ko sitä tansaa etheenpäin elämässä.

 /Simon

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".